Qırımtatar Milliy Meclisiniñ eñ faal azalarına qarşı cinaiy işler açılacaqtır. Bunı Rusiye advokatı Nikolay Polozov 112 Ukraina kanalınıñ yayınında ayttı.
«İleride Meclis vekillerine nisbeten bir sıra memuriy iş (mence, işlerniñ bir qısmı cinaiy olıp, Meclisniñ eñ faal azalarına qarşı açılacaqtır) qorquzuv areketleriniñ nevbetteki basamağı olacaqtır», – dep ayttı Polozov.
Bundan evel advokat işğal etilgen Qırımda oña qarşı cinaiy iş açmağa planlaştırılğanını aytqan edi.
Rusiyege bağlı olğan Qırım Yuqarı Mahkemesi aprel 26 künü Meclisniñ areketini toqtatmaq qararını alğan edi. Dünya toplulığı rus akimiyetiniñ böyle faaliyetine qatiyen qarşı çıqtı. Meclisniñ imayesi Rusiye Yuqarı Mahkemesine şikâyet arizasını yollağan edi.
Sentâbr 29-da Rusiye Yuqarı Mahkemesi şikâyet arizasına cevap olaraq, Qırımtatar Milliy Meclis areketiniñ yasaqlanmasını tasdiqladı.
Ukrainı Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı ve esirlerni azat etmege çağırdı.