Aqmescitniñ Kiyev rayonı mahkemesi oktâbr 12-de evlerinde tintüv keçirilgen beş qırımtatarına ceza ükmüni çıqardı. Bunı advokat Emil Kürbedinov Facebookta bildirdi.
«Bir vaqıtları ukrain mahkemecisi olğan insan beş qırımtatarı, Qırım musulmanınıñ apis cezasını çıqarğanda soy-sop, diñleyiciler ve lâqayt qalmağan insanlar mahkemede edi. Bundan ğayrı, mence, eñ küçük zal saylandı, anda üç diñleyici zornen sığdı, mahkemeci İnsan aqları konventsiyasını körmemezlikke urıp, Teymurnı (Teymur Abdullayev – QA) bağlı ve demir qafeste tuttı, soñra da ağlağan anasını quvdı», – dep ayttı advokat.
Onıñ bildirgenine köre, imaye tarafı mahkeme qararından şikâyet etecek ola.
Qırımda çarşenbe künü, oktâbr 12-de, qırımtatarlarnıñ evlerinde tintüvler olıp keçti. Qırımtatarlarnıñ advokatları ve Rusiye kütleviy haber vastaları beş tintüv aqqında bildirdiler.
Qırım siyasetşınası Yeleonora Dülber Facebook saifesinde oktâbt 12-de sabadan Rusiye uquq qoruyıcıları kelgen insanlarnıñ adlarını ve yaşağan yerlerini yazdı.
«Tintüv keçirilgen qırımtatarlar cedveli: Rustem İsmailov, 32 yaşında, Boğurça (Kamenka), Abdullayev Uzair, 42 yaşında, Mamaq (Strogonovka), Abdullayev Teymur, 41 yaşında, Mamaq (Strogonovka), Cemadenov Emil, Saledinov Ayder», – dep bildirdi Dülber.
Qırım advokatı Emil Kürbedinov bildirdi ki, Qırımda yaqalanğanlar «terrorizm maddesi» boyunca şeklene.
«Timur Abdullayev 205.5 maddesiniñ 1-inci qısmı boyunca qabaatlana, Üzeir Abdullayev, Rustem İsmailov, Ayder Saledinov ve Emil Cemadenovnı 205.5 maddesiniñ 2-nci qısmı boyunca qabaat berile», – dep ayttı advokat.
Qırım jurnalisti Lilâ Bucurova Facebookta bildirdi ki, «Bizim balalar» cemaat areketi oktâbr 12-de Qırımda yaqalanğanlarnıñ balalarını baqacaq.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.