Cumaaqşamı künü, oktâbr 13-de, Rusiye kontrol etken Qırım Yuqarı mahkemesi Qırımtatar Milliy Meclisiniñ reis muavini Ahtem Çiygoznıñ apiste tutma müddetini arttırma qararından berilgen şikâyet arizasını baqacaq. Bunı Çiygoznıñ advokatı Nikolay Polozov Twitterde bildirdi.
«Bugün apansızdan Çiygoznıñ işi boyunca daa bir mahkeme toplaşuvınıñ keçirilmesi – şikâyet arizası boyunca – belgilendi. Vaqtında haber etilmedi», – dep yazdı Polozov.
На сегодня внезапно назначили ещё одно судебное заседание по делу Чийгоза - апелляцию на продление стражи. Вовремя не уведомили #FreeChiygoz
— Николай Полозов (@nikolai_polozov) October 13, 2016
Oktâbr 13-de mahkeme «Çiygoznıñ işi» boyunca zarar körgenlerni de sorğuğa çekti.
«Birinci zarar körgen kişi – Pogorelov Vladimir Vasilyeviç, ekincisi – Yernev Sergey Valentinoviç, «halq göñüllileriniñ» 2-nci rota komandanı», – dep bildirdi Twitterde Polozov.
Polozov tahmin etkenine köre, oktâbr soñuna qadar mahkeme zarar körgenlerni sorğuğa çeker, soñra ise qabaat şaatlarınıñ sorğuları başlaycaqtır.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Ukrainı Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunen beraber TİN Dünya toplulığına muracaat etip, bütün mumkün olğan siyasiy ve uquqiy çareler ile Rusiyege tesir etmege, onıñ totalitar usullarnen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.