Qırım Muhtar Cumhuriyetindeki Ukraina milliy politsiyasınıñ baş idaresi Dünya qırımtatar kongressi icra şurasınıñ azası Ervin İbragimovnıñ qaçırılmasını taqiq etip, bu işnen bağlı deliller toplay. Bunı QMC prokurorı Günduz Mamudov Qırım.Aqiqat mühbiriniñ informatsion muracaatına cevap olaraq bildirdi.
«İşbu cinaiy taqiqatta delil almaq (toplamaq) içün taqiqat qıdıruv işleri yapılmaqta. Böylece, taqiqatçı Qırımtatar Milliy Meclisiniñ reisi, Qırımtatar Milliy Qurultayı Merkeziy saylav komissiyasınıñ reisi ve Qırımtatar Milliy Meclisi reisiniñ birinci muavinine muracaat etip, mezkür cinayet aqqında malümat bere bilecek şahıslar aqqında haber etmelerini rica etti», – dep aytıla vesiqada.
Cevapta qayd etile ki, Meclis ve Qurultay azalarınıñ cevapları şimdilik yoq. QMC prokurorı bildirdi ki, Milliy politsiyanıñ Qırım bölügi Ervin İbragimovnıñ soy-soplarınen bağlanıp, taqiqat tedbirlerini keçirmek kerek.
Dünya qırımtatar kongressi icra şurasınıñ azası Ervin İbragimov 2016 senesi mayıs 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.
Rusiye Taqiqat komitetiniñ Qırım idaresi faalniñ qaçırılmasınen bağlı cinaiy iş açtı. Rusiye taqiqat 3 versiyanı aydınlata: para qazanma maqsadınen qaçıruv, İbragimovnıñ ticaret işinen bağlı olması ve Qırımdaki vaziyetni kerginleştirmek maqsadınen qaçıruv.
İbragimovnıñ aqrabaları ve Meclis azalarınıñ fikirince, onı Rusiye mahsus hızmetleri qaçırıp, qırımtatarlarnı ve «razı olmağanlarnı» qorquzacaq olalar.
Qırım Muhtar Cumhuriyetiniñ peokuraturası faalniñ qaçırılması boyunca Ukraina Cinaiy kodeksiniñ 115 maddesi boyunca iş açtı.
Qırım uquq qorçalayıcı gruppanıñ esaplarına köre, 2014 senesi fevral ayından başlap Qırımda 9 insan zorbalıqnen ğayıp oldı. Onlardan beşi – qırımtatarları. Daa üç adise, uquq qorçalayıcılarnıñ fikrine köre, zorba ile çaçırıluvğa beñzey, lâkin tam olaraq belli değil.
Uquq qorçalayıcılar yarımadada insanlarnıñ ğayıp olması olarnıñ siyasiy mrvamı ya da milliy mensüpliginen bağlı olğanını tasdiqlaylar. Qırım uquq qorçalayıcı gruppa insanlarnı Rusiye akimiyeti ya da onıñ nezareti adındaki silâlanğan gruppalar qaçırdı.
Qırımdaki akimiyet fakt olaraq insanlarnıñ ğayıp olğanlarını qabul ete, lâkin özü bunen bağlı olğanını inkâr ete ve qaçıruvlarnıñ maqsadı – Qırımnıñ işğalinen razı olmağan yarımada sakinkerini qorqutmaq olğanını da red ete.