Büyük Britaniyanıñ Birleşken Milletler teşkilâtındaki daimiy temsilcisi Matthew Rycroft Rusiye dünya toplulığından daa ziyade ayırılğanını ayttı. Böyle beyanatnı o BM Telükesizlik şurasında Suriye boyunca Frenkistan ve İspaniya tarafından teklif etilgen rezolütsiya leyhasına Rusiye temsilcisi veto qoyğan soñ seslendirdi.
«Rusiye ayırılmağa devam ete. Beklenmezden degil. Olar Halepte hastahanelerni, mektepleri, qabaatsız canlarnı yoq eteler. BM Telükesizlik şurasında veto aqqınen suriyelilerniñ ümütini yoq eteler», – dep yazdı Britaniyalı diplomat öz Twitter saifesinde.
BM Telükesizlik şura toplaşuvınıñ soñunda Rusiye elçisi Vitaliy Çürkin, oktâbr ayı devamında şuranıñ reisi olup, Suriye prezidenti Başer Asad rejiminiñ temsilcisine söz berdi. Bundan soñ meclis iştirakçileriniñ çoqusı salonnı terk etti.
Bundan ögüne oktâbr 8 künü BM Telükesizlik şurasınıñ rezolütsiyasını Rusiye blok etken edi. Şu rezolütsiya Suriyedeki Halep şeeri üzerinde arbiy uçuşlarnı ve uçaq darbelerini yasaqlamaq kerek edi. Rezolütsiya leyhasını Frenkistan ve İspaniya diplomatları beraberlikte azırlağan ediler. Leyhanı Frenkistan Tışqı işler naziri Jean-Marc Ayrault taqdim etti.
Frenkistan-İspaniya leyhasına Telükesizlik şurasıñ 11 azası, şu cumleden Ukraina da qoltuttı. Eki aza bitaraf qaldı, olardan biri de – Çin. Leyhağa qarşı Rusiyeden qayrı Venesuela da rey berdi, lâkin Rusiyeniñ reyi eñ emiyetli oldı, çünki o Telükesizlik şurasınıñ daimiy azası ola.
Evelleri bu afta AQŞ devlet kâtibi John Kerry Frenkistan Tışqı işler naziri Jean-Marc Ayrault ile körüşüv keçirmezden ögüne Rusiyeniñ Suriyede yapqan areketleri, yani barışıqlı suriyelilerniñ bombalanması, arbiy cinayetler olaraq taqiq etilmek kerek olğanlarını beyan etken edi. Rusiye TİN vekili Mariya Zaharova AQŞ devlet kâtibiniñ bu sözlerini «propaganda» kibi adlandırdı.