Qırım mühbiri Mıkola Semenanıñ kibi işler halqara seviyede, bütün forumlar ve meydançıqlarda ilân etilmek kerek, çünki bunıñ açıqlaması yardım ete, dep bildirdi Qırım mühbiri Semenanıñ adliyecisi Emil Kurbedinov.
«Bu işniñ açıqlaması em bizge, adliyecilerge, em de asılında kelecekte mühbirlerniñ aqları böyle bozuvlarınıñ ögüni körmege yardım etecek. Bu iş siyasiydir, demek ki, tek uquq taraftan irişe bilecegimiz azdır. Kelecekte bu açıqlama seviyesini eksiltmemege tırışacaqmız, mühbirlernen çalışmağa daima azırmız», – dep bildire Kurbedinovnıñ sözlerini Ukraina Milliy mühbirler birliginiñ matbuat hızmeti (UMMB).
Mühbirniñ Ukraina qıtaiy qısmına tedaviylenüv içün çıqışı yaqında yasaq olunğanına baqmadan, adliyeciler vaziyetniñ müsbet neticeleri olacağına ümüt besley.
«Bu, Rusiyede neticesi endi evelden belli olğan işlerden biridir. Ümüt etemiz ki, qarar şartlı olacaq, amma aynı vaqıtta Avropa mahkemesinde adaletni qıdıracaqmız. Ve işanamız ki, o yerde müsbet netice olur. Mühbirler yapa bilecek rezonans ise, bu işte pek yardım etecektir», – dep qayd etti adliyeci.
UMMB birinci kâtibi Sergey Tomilenkonıñ sözlerine binaen, Ukraina Mühbirler birligi Mıkola Semenanıñ işine halqara seviyede diqqatnı maksimal şekilde celp etmege tırışa.
Böyleliknen, sentâbr 19-20 künleri Birleşken Milletler Teşkilâtı Cenevre ofisinde keçirilgen «Milliy, ırq ve diniy nefret teşviqatına qarşı küreşte kütleviy haber vastalarınıñ rolü» adlı seminar devamında Mıkola Semenanıñ taqip etilmesi meselesi aqqında UMMB birinci kâtibi Sergey Tomilenko, Qırım mühbiri Yelena Yurçenko, uquq qoruyıcı Maksim Butkeviç söz yürsettiler.
Baarde Qırımda kütleviy şekilde tintüvler, bu cümleden, Qırım.Aqiqat ile işbirlik tutqanında şeklenilgen mustaqil mühbirlerde tintüvler keçirildi. Radio Svoboda müellifi Mıkola Semenağa qarşı Rusiye Federatsiyasınıñ topraq bütünligini bozmaq çağırğanında şeklenilüv boyunca cinaiy iş açıldı. Rusiyeli taqiqat oña yarımadadan çıqmağa yasaq etti.
Ukraina Tışqı işler nazirligi Ukraina vatandaşlarınıñ, hususan, mühbir Mıkola Semenanıñ işğal etilgen Qırımda taqip etilmesinden qasevet çekkenini bildirdi ve oña basımnı toqtatmağa çağırdı.
Avgust 23-te Mıkola Semenanıñ imayesi FSB-nı mühbirni Qırımdan tedaviylenüvge yibermege çağırdı.
Bundan evel Halqara ve Avropa mühbirler Federatsiyası rusiyeli ükümetten Mıkola Semenanıñ Kiyevge tedaviylenüvge yiberilmesini talap etti.