AQŞ prezidentiniñ muavini Joe Bayden Ukraina prezidenti Petro Poroşenkonı faal şekilde siyasiy ve iqtisadiy islâat keçirmege çağırdı, bu yapılmasa, Avropa Birligi bazı devletleri Rusiyege qarşı sanktsiyalarnı lâğu ete bilecegi telükesi bar. Bu aqta Radio Svoboda, Reuters agentligine esaslanıp, bildire.
New-Yorkta Halqara munasebetler boyunca Şurada çıqışta bulunıp, Bayden qayd etti ki, ukrain ükümeti sebep berse, Moskvağa qarşı sanktsiyalarnı eñ azdan beş devlet lâğu ete bile.
Baydenniñ sözlerine binaen, o, «buhran başlağanından berli» er afta eki-üç saat ukrain reberiyetinen laf ete, islâat keçirmege çağıra, bundan da ğayrı, «Almaniya, Frenkistan ve İtaliyanı sanktisyalarnı saqlamağa qandıra».
Sentâbr 21-de Ukraina prezidenti Petro Poroşenko Amerika Qoşma Ştatları prezidenti Barak Obama ile körüşüv keçirdi.
Bundan evel, sentâbr 21-de, çarşenbe künü Poroşenko Birleşken Milletler Teşkilâtı Baş Assambleyasında çıqışta bulunıp, parlamentariylerge işğal etilgen Qırımda Rusiye Federatsiyası tarafından insan aqları bozuluvı aqqında hatırlattı.
Poroşenko ilân etti ki, Rusiye tarafından yapılğan büyük bozuv, Meclisniñ yasaq etilmesi, bunen beraber, İlmi Umerovnıñ mecburiy psihiatrik hastahanede tutulması ola.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.