İşğal etilgen Qırımda Rusiye Devlet Dumasına saylavlarda bir mandatlı okruglar boyunca «Yedinaya Rossiya» firqasından namzetler Andrey Kozenko, Konstantin Baharev ve Svetlana Savçenko birinci yerni tuta. Bunı Rusiye Merkeziy saylav komissiyasınıñ malümatı köstere, dep bildire RİA Novosti agentligi (Qırım).
Saat 7.13-te olğan malümatqa köre, «Yedinaya Rossiya» firqasından 19 sanlı bir mandatlı saylav okrugı boyunca namzet Kozenko reylerniñ 63,56%-nı aldı (oña 106885 insan rey berdi). Ekinci yerni LDPR firqasından namzet Oleg Klimçuk aldı, onıñ 11,10% oldı (18660 insan), üçünci yerde 7,08%-nen (11907 insan) «Adaletli Rusiye» firqasından namzet Yelena Gritsak yerleşti. 19 sanlı okrug boyunca protokollarnıñ 81,59%-ı baqıldı.
Protokollarnıñ 83,80%-ı baqılğan 20 sanlı okrug boyunca lider «Yedinaya Rossiya» firqasından namzet Baharev oldı. Onıñ 69,74%-ı oldı (131745 insan). Ekinci yerde – 7,19%-nen (13578 insan) LDPR-den İgor Kiyko, üçünci yerde – reylerniñ 5,37%-ınen (10152 insan) KPRF-ten Stepan Kiskin oldı.
«Yedinaya Rossiya» firqasından namzet Svetlana Savçemko 21 sanlı okrug boyunca birinci yerni tuta. O, 72,36% (155095 insan) aldı. Ondan soñ LDPR-den PAvel Şperov (7,22%, 15476 insan) ve KPRF-ten Oleg Solomahin (5,70%, 12226 insan) kele. Bu yerde protokollarnıñ 85,25%-ını baqıp çıqtılar.
Sentâbr 18-de, bazar künü Rusiyede Devlet Dumasına saylavlar keçirildi. Moskva rey berüvni işğal etilgen Qırımda da keçirmege qarar aldı, bunı ise, Kiyev ve bir sıra Çarp devletleti qattı tenqit etti.