Şeer quruvı ve topraq resursları bölüginiñ yolbaşçısı Elza Makarova ve memuriyet yolbaşçısı muavini Aleksandr Trânov Kremlge boysunğan Bağçasaray memuriyeti yolbaşçısı vazifesine namzet oldı. Konkurs komissiyası tarafından qabul etilgen bu qarar «Krım 24» yayınında seslendirildi, dep bildire «Krıminform» saytı.
Bildirilgenine köre,daa bir namzet, Bağçasaray şeer şurası yolbaşçısınıñ muavini Andrey Pozdnâkov konkurs komissiyasınıñ saylavından keçmedi.
Bundan evel deputatlar sessiyada Bağçasaray memuriyeti yolbaşçısı İgor BEletskiyniñ öz isteginen istifağa çıqqanı aqqında ve Bağçasaray memuriyeti yolbaşçısı vazifesine konkurs ilân etüv aqqında arizanı baqtı.
BEletskiyniñ istifağa çıqqanı aqqında Kreml tarafından tayinlengen Qırım ükümeti yolbaşçısı Sergey Aksönov bildirgen edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.