Qırımtatar Milliy Meclisi işğal etilgen Qırım toprağında yaşağan vatandaşlarnı Rusiye Federatsiyası keçirgen saylavlarda iştirak etmemege çağıra. Bu, sentâbr 18-de keçirilecek Devlet Dumasına saylavlarnen de bağlı.
Bu aqta Qırım.Aqiqat Radiosınıñ saba yayınında qırımtatar halqınıñ aqları saqlaması boyunca Meclis komitetiniñ reisi Eskender Bariyev bildirdi.
«Meclis referendumda iştirak etmemege, 2014 senesi sentâbr 14-te keçirilgen yerli saylavlarda iştirak etmemege çağırğan edi, ve, elbet, bugün de saylavlarda iştirak etmege iç te olmaz, çünki bu, halqara uquq bozuvıdır, bu ceryanlarda iştirak etmesi – cinayettir», – dedi Bariyev.
Your browser doesn’t support HTML5
Сложный выбор. Признают ли депутатов Госдумы РФ от аннексированного Крыма
Sentâbr 18-de keçirilmesi planlaştırılğan Rusiye Devlet Dumasına saylavlar qarışıq sistema boyunca teşkil etilecek: 225 deputat firqa cedvelleri boyunca, 225 deputat bir mandatlı okruglar boyunca saylanacaq. İlk sefer rey berüv işğal etilgen Qırımda da keçirilecek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.