Sentâbr 2-de saba Özbekistan ükümeti ilân etti ki, devlet prezidenti İslam Karimov insulttan soñ pek ağır alda buluna. Beyanat «Halq sözü» resmiy gazetasında derc etildi.
Beyanatqa binaen, Karimov avgust 24-te hastahanege ketirildi ve soñki künler devamında onıñ alı «pek yaramaylaştı, ekimler onıñ soñ derece ağır olğanını saya».
«Ürmetli vatandaşlar, teren qaar-qasevet ile bildiremiz ki, soñki kün içinde Prezidentimizniñ sağlığı birden yaramaylaştı ve ekimler onıñ alı soñ derece ağır olğanını ayta», – dep qayd etile özbek ükümetiniñ beyanatında.
Sentâbr 1-de Özbekistannıñ 25-ci Mustaqillik kününe bağışlanğan bayram merasimlerinde 78 yaşındaki Karimov iştirak etmedi.
Resmiy tasdıqlanmağan bazı beyanatlarda qayd etilgen edi ki, Karimov avgust 29-da vefat etti. Bu öşeklerge sentâbr 1-de yañı beyanatlar qoşuldı ki, Karimovnıñ tuvğan şeeri Samarkand merkezinde soqaqlar merkeziy meydanda temizlik ve qurucılıq işleri içün qapatıldı.