Sentâbr 1-de Özbekistan, prezident İslam Karimovnıñ alı belgisiz olğanda, mustaqilliginiñ 25 yıllığını qayd ete.
Avgust 28-den başlap prezidentniñ sağlığı aqqında resmiy beyanatlar olmağan vaqıtta, Karimov 25 yıl devamında eda etken vazife içün sırlı küreş alıp barılğanı aqqında öşekler çoqlaşa. Bazı haber vastalarıKarimovnıñ avgust 29-da ölgeni aqqında resmiy tasdıqlanmağan malümat bildire.
Karimovnıñ kiçik qızı Lola Karimova-Tillâyeva avgust 31-de içtimaiy ağlarda bildirdi ki, onıñ 78 yaşındaki babası sağ ve miyge qan aqmasından soñ tedaviylene bile.
Karimov sentâbr 1-de Mustaqillik künü Taşkentte sözde bulunmaq kerek edi. Amma bu çıqış olacaq kontsert lâğu etildi, diger bayram merasimleri sıñırlandı. Avgust 31-de aqşam özbek devlet telekanalı Karimovnıñ adından bayram nutqunı taqdim etti.
Mustaqillik yubileyine bağışlanğan bayram merasimlerinde avgust 31-de Özbekistan baş naziri Şavkat Mirziyayev yolbaşçılıq etti.