İyün 1-den başlap, «Hizb ut-Tahrir» ile bağlı olğanında qabaatlanğan Qırım musulmanları boyunca iş diñlenilgen Rostov-na-Donu şeerindeki Şimaliy Qavqaz okrug arbiy mahkemesi, beklenilgenine köre, sentâbr 7-de qararnı ilân etecek. Toplaşuvnıñ keçirilmesi saat 10.00-ğa planlaştırğan.
Avgust 31-de dört qabaatlanğan kişi – Ruslan Zeytullayev, Rustem Vaitov, Nuri Primov ve Ferat Sayfullayev – soñki söznen çıqışta bulundı.
Rusiyeli ükümet «Hizb ut-Tahrir» bölüginiñ teşkilâtçısı dep aytqan Aqyarlı Ruslan Zeytullayev mahkemeni adaletli qarar almağa çağırldı. Onıñ qayd etkenine köre, dört Qırım musulmanınıñ er biri boyunca qarar, olar Rostovğa ketirlmegeninden evel alındı.
Adliyeci Emil Kurbedinov taqiqatnıñ versiyaları mantıqsız olğanını ayttı ve qırımlılarnı qabaatlav boyunca deliller yoq olğanını qayd etti.
Rusiyeli prokuror Qırım musulmanları içün, yani Ruslan Zeytullayev içün, «teşkilâtçı» olaraq, 17 yılğa qattı nizam koloniyasına, Rustem Vaitov ve Nuri Primov içün yedi yılğa umumiy nizam tüzelme koloniyasına, Ferat Sayfullayev içün sekiz yılğa aynı umumiy nizam tüzelme koloniyasına qapatılmasını soradı.
Rostov-na-Donu şeerindeki Şimaliy Qavqaz okrug arbiy mahkemesinde «Hizb ut-Tahrir» teşkilâtınen bağlı olğanında qabaatlanğan Qırım musulmanları Ruslan Zeytullayev, Rustem Vaitov, Nuri Primov ve Ferat Sayfullayev mahküm etile. Olar 2015 senesi qışta Aqyarda yaqalandı. Mayıs ayında olarnıñ apiste bulunma müddeti oktâbr ayına qadar uzattırıldı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.