Ukraina prezidenti Petro Poroşenko, Mustaqillik kününe bağışlanğan arbiy parad merasiminde sözde bulunıp, Ukraina topraq bütünligi içün küreşken qırımtatarlarnıñ ve diger halqlarnıñ vatanperverligini qayd etti.
«Ukrainler, etnik rusiyeliler, qırımtatarlar ve diger halqlar – episi ukrain vatanperverligi noqta-i nazarında qattı tura. Bir biriniñ yanında elinde silânen devletimizni qorçalaylar. Cemaatnı bölgen zalımlar ve siyasetçilerni ebediyen toqtatmaq içün bu birlik anini qullanmasaq, tarih bizge iç bir vaqıt bunı bağışlamaz», – dep ayttı Poroşenko, ve Ukrainada işğal etilgen Qırım ve Donbass sakinleri aqqında hatırlağanlarını qayd etti.
«Sizni tüşünemiz. Bizim içün siz bizimkisiñiz, tuvğan, yaqınsıñız, vaqtınca qorantañıznen ayırılğansıñız, amma mıtlaqa birleşeceksiñiz», – dep ayttı Poroşenko.
Prezidentniñ sözlerine köre, Ukraina qorçalamasınıñ yekane kefili devletniñ Silâlı quvetleri ola.
«Mustaqilligimizniñ esas kefili Ukraina Silâlı quvetleri ola. Ve bu, Budapeşt memorandumından daa ciddiydir», – dep ayttı o.
Avgust 24-te, çarşenbe künü Ukrainada Mustaqillik künü qayd etile. 25-ci doğğan kününde bütün devlet boyunca tantanalı merasimler keçirilecek. Kiyev merkezinde arbiy tehnika paradı teşkil etilecek.
Qırım Rusiye tarafından işğal etilgen soñ yarımadada Ukraina Mustaqillik künü yarı gizli şekilde qayd etile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.