Rusiye tarafından işğal etilgen Qırımnıñ Kreml tarafından tayinlengen ameldeki yolbaşçısı Sergey Aksönov Aqmescit şeer 7-ci hastahanesini ziyaret etti. İşbu hastahanede şimdiki vaqıtta Meclis reisiniñ muavini İlmi Umerov tedaviylenüvden keçe, onı bu yerge infarkt telükesinen alıp ketirdiler.
«Tamir etilgen bölüklerni baqıp çıqqan soñ, Sergey Aksönov qayd etti ki, cumhuriyetniñ bütün hastahaneleriniñ aynı bu tıbbiy müessise kibi olması kerek», – dep bildire yarımadanıñ Kremlge boysunğan ükümetiniñ matbuat hızmeti.
Qayd etilgenine köre, hastahanede qabul etüv bölügi, kardiologiya ve nevrologiya bölükleri tamir etildi.
Matbuat hızmetiniñ fotoresimlerinde körüne ki, Aksönov bir qaç hastahane odasını ziyaret etti, amma o, İlmi Umerovnen körüştimi, malümat bildirilmey.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
Qırım.Aqiqat Aksönovnıñ hastahanege ziyareti aqqında daa tafsilâtlı malümatnı ögrenmege tırışa.
Avgust 17-de Qırımtatar Milliy Meclisi reisiniñ birinci muavini Nariman Celâl İlmi Umerovnı hastahanede ziyaret etti ve bildirdi ki, ekimler onıñ yüreknen bağlı problemalarını belgiledi. Buña baqmadan, rusiyeli FSB, Umerovnıñ mahkeme-psihiatrik ekspertizadan keçmesi içün, onıñ hastahaneden çıqmasını talap etmege devam ete.
İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit hastahanesine infarkt havfı ile alıp kettiler. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.