«Asker» cemaat teşkilâtı işğal etilgen Qırım ile memuriy sıñırdaki vaziyetni mahsus hızmetlerniñ areketleri dep adladı. Böyle fikirni Qırım.Aqiqatqa memuriy sıñırda ukrain sıñırcılarınen beraber hızmet etken teşkilâtnıñ temsilcisi Evelina Arifova bildirdi.
Avgust 7-den başlap Rusiye tarafı kiriş noqtalarından vatandaşlar ve naqliyeniñ areketini toqtattı, bundan soñ areket qısmen yañıdan başlatıldı.
«Bu, kene de vaziyetni kerginleştirmek maqsadınen yapılğan FSB areketleridir, bu bir. Nasıldır test yapmaq içün, sıñırcılarımız işbu vaziyette nasıl areket eteceklerine baqmaq içün, daa bir kere ukrain tarafını qabaatlamaq içün yapılğandır», – dedi Evelina Arifova.
Onıñ sözlerine köre, Qırımdan sıñırnı keçken kişilerden bazıları, olarnı hususan ukrain tarafı yibermegenini tüşüngen.
Çonğarda (Herson vilâyeti) nevbet, 2016 senesi avgust 7
O, Qırımda sañki yapılğan diversiyanı FSB provokatsiyası dep adlandırdı.
«Küzge yaqın provokatsiyalar devam etecektir. Diversiya dep, qırımtatarlarnıñ ayağı altına qarpız qabuğını qoya bileler, bunı ukrainler, qıqrımtatarlar yaptı dep, olarğa nasıldır eşyalar qoya bileler. Vaziyetni kerginleştirmek içün, daa çoq tehnika, daa çoq askerlerni ketire bileler. Hususan, qırımtatarlar toplu yaşağan yerlerge», – dep qayd etti «Asker» temsilcisi.
Qırımnıñ rusiyeli ükümeti avgust 7-de, sebeplerni añlatmayıp, şahıslar ve naqliyeniñ memuriy sıñırdan keçüvini toqtattı. Kün devamında memuriy sıñırda areket qısmen yañıdan başlatıldı.
Çonğarda (Herson vilâyeti) nevbet, 2016 senesi, avgust 7
Rusiye kütleviy haber vastaları, resmiy malümat olmadan, Qırım ile memuriy sıñırda sanki yüz bergen atışma aqqında bildirmege başladı. Bunen beraber, Rusiye kütleviy haber vastaları, memuriy sıñırda keçüvni ukrain tarafı qapatqan, dep qayd etti.
Bazarertesi künü, Ukraina Devlet sıñır hızmetiniñ malümatına köre, «Kalançak» bütünley blok etilgen, «Çaplinka» keçirüv noqtasında adamlar tek Qırım tarafında yiberile, «Çonğarda» eki tarafqa yol açıq.
Rusiyege tarafınıñ memuriy sıñırdaki bu vaziyet aqqında izaatı yoq.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.