Büyük Britaniyada London merkezinde qadın öldürüvi ve daa beş kişini yaralama boyunca şeklenilgen aqay kişi yaqalandı.
Elde etilgen malümatqa binaen, bu, 19 yaşındaki Somaliyada doğğan Norvegiya vatandaşı ola.
Politsiyanıñ bildirgenine köre, onıñ radikal olğanını körmedi. Politsiya komissarınıñ yardımcısı Mark Rouliniñ aytqanına binaen, uquq qoruyıcılarnıñ fikrince, ücüm planlaştırılmağan ve qurbanlar tesadufiy oldı.
Ücüm çarşenbe künü aqşam London merkezindeki Rassel-skver meydanında yüz berdi. Ücümci pıçaqnen AQŞ vatandaşı olğan qadınnı yaraladı, soñra o vefat etti. Bunen beraber, Büyük Britaniya, AQŞ, İsrail ve Avstraliya vatandaşları olğan daa beş kişi yaralandı, olardan eki insan daa hastahanede buluna.
London merkezinde ücüm yüz bergen soñ havfsızlıq tedbirleri quvetleştirildi. Şeer yolbaşçısı Sadık Han adamlarnı tınçlıqnı saqlap tutmağa ve muqayt olmağa çağırdı.