Qırım meskün yerleriniñ adlarını Ukraina Yuqarı Radasınıñ mütenasip qanunına binaen deñiştirmek içün Google harita servisi olğan Google Maps hadimlerine vaqıt kerek oldı, çünki şirket hadimleri topografik adlarnı tercime etmek mecbur edi. Bunıñ içün Google Maps online haritasında yañı adlar tek iyül 28-de peyda oldı, dep bildirdi Qırım.Aqiqat Radiosınıñ saba yayınında ukrain IT-mütehassısı Mihail Koltsov.
Your browser doesn’t support HTML5
Радио Крым.Реалии | Занимательная топонимика. Почему Google «декоммунизировал» Крым, а потом вернул все назад
«Olarnıñ bu adlarnı, añlamlarnı tercime etüv boyunca büyük işi bar edi, tek bundan soñ implementatsiya oldı. Mesele şu ki, olarnıñ taqımı pek büyük degil, ve olar er şeyni tertip boyunca yapalar. Ğaliba, biz nevbetke tüştik», – dep qayd etti o.
Aynı vaqıtta, Qırım haritasına bundan evel olğan sovet adlarını qaytarmaq içün, Google Mapske tek bir kün kerek oldı, çünki bu areket tehnikiy taraftan qıyın degil ve «bir noqtağa basuvnen» çezile, dep añlattı IT-mütehassıs.
İyül soñunda Google Maps servisi Qırım meskün yerleriniñ adlarını bir qaç kere deñiştirgen edi. İyül 28-de servis, Ukraina Yuqarı Radası tarafından qabul etilgen dekommunizatsiya aqqında qanunğa esaslanıp, yarımada bazı rayonları, şeerleri ve köyleriniñ adlarını deñiştirdi. Bir kün keçken soñ Google adlarnı kene de sovet adlarına deñiştirdi, bunıñ ögüni rusiyeli kütleviy haber vastalarında bir sıra narazılıq neşirleri aldı.
Google mütehassısları tarafından yapılğan adlarnıñ bütün deñiştirilmeleri Ukraina Yuqarı Radasınıñ «Qırım Muhtar Cumhuriyeti ve Aqyarnıñ ayrı meskün yerleri ve rayonlarınıñ adları deñiştirilüvi aqqında» qanunından alındı. Vesiqağa binaen, yañı adlar yarımada Ukraina uquq saasına qaytarılacağından soñ işke tüşürilecektir.
Mayıs 5-te Ukraina prezidenti Petro Poroşenko bundan evel Yuqarı Rada tarafından qabul etilgen «Ukrainada kommunizm ve natsizm totalitar nizamınıñ takbih etilmesi ve olarnıñ timsalleriniñ teşviqatını yasaq etilmesi aqqında» qanunını imzaladı. Qanun boyunca, sovet reberiyetinen bağlı bütün coğrafik adlarnı deñiştirmeli. Qırımda 75 meskün yeri ve beş rayonnıñ adı deñiştirildi. Yañı adlarnıñ çoqusı qırımtatardır.