«Novorossiya» sabıq spikeri Oleg Tsarövnıñ qorantası Rusiyeden işğal etilgen Qırımdaki knâz Mihail Romanovnıñ çiftligini aldı, dep bildire «Dojd» telekanalı.
Şimdiki vaqıtta mimarcılıq abidesi olğan binada «Ay Todor» bala şifahanesi yerleşe. 2015 senesi noyabr ayında Qırım iqtisadiy inkişaf nazirligi onıñ tamir etilmesini «Raduga» şirketine buyurdı, Tsarövnıñ anası onıñ yolbaşçısı ola, onıñ tesisçisi ise, Oleg Tsarövnıñ özü ve onıñ apayınıñ «Selbillâr» şirketi ola, dep bildire telekanal.
Tsaröv «Dojd» telekanalına bu malümatnı tasdıqladı ve leyhanen şahsen oğraşa bilgenini bildirdi.
«Ay Todor» şifahanesiniñ Tsaröv qorantasına teslim etilmesi sheması
Bunen beraber, telekanal, onıñ elinde olğan añlaşmağa esaslanıp, bildirdi ki, 2016 senesi mayıs ayından 2024 senesi dekabr ayına qadar yatırımcı devletke 254 million ruble bergi tölemege mecburiyetini boynuna ala.
Sabıq regional, şimdiki vaqıtta ise «Novorossiya» parlamentiniñ spikeri Tsaröv Ukrainada qıdıruvğa ilân etilgen.
2014 senesi Ukraina Baş prokuraturası Yuqarı Radağa Oleg Tsarövnı cinaiy mesüliyetke celp etme ve onıñ qabaatlavnı belgilemek içün yaqalaması aqqında ariza kirsetti. İyün 3-te Yuqarı Rada, kerek olğan minimum 226 rey ile, parlamentariylerniñ 235 reyinen Tsarövnı deputat toqunmamasından marum etti ve onı yaqalamaq içün razılıq berdi. O vaqıt Tsaröv Qırımda edi, o yerde, onıñ sözlerine köre, o, ukrain ükümetinen küreşini devam etmege niyetlene edi.