İşğal etilgen Qırımnıñ Rusiyege boysunğan Yuqarı mahkemesi, bu sene mayıs 12-de Bağçasarayda yaqalanıp, «terrorizmde» qabaatlanğan 4 qırımtatarnı apiste qaldırdı. Bu aqta adliyeci Emil Kurbedinov bildirdi.
«Qırım Yuqarı mahkemesinde terrorizmde qabaatlanğan qırımtatarlarnıñ «Bağçasaraylı dörtü», bu cümleden Enver Mamutovnıñ yaqalanmasına qarşı adliyecilerniñ appelâtsiya mahkemesine bergen şikâyetleri boyunca toplaşuv yekünlendi. Mahkeme imayeniñ delillerini qabul etmedi (er vaqıt olğanı kibi) ve er kesni taqiqat izolâtorında qaldırdı», – dep yazdı o Facebook saifesinde.
Toplaşuv video konferentsiyası rejiminde keçirildi.
Yaqalavğa qarşı şikâyet arizasınıñ baqılması iyül 21-de, cumaaqşamı keçirilmek kerek edi, amma toplaşuv, SİZO-da «bomba qoyulğanı» sebebinden, iyül 22-ge keçirldi.
Mayıs 12-de Bağçasarayda rusiyeli uquq qoruyıcılar musulmanlarnıñ evlerinde ve yerli qavehanede bir sıra tintüvler keçirdi. Neticede, dört Bağçasaray sakini yaqalandı ve terrorizmde qabaatlandı: Zevri Abseitov, Remzi Memetov, Rustem Abeltarov ve Enver Mamutov. Olar FSB hadimleri tarafından Rusiyede terroristik teşkilâtı olaraq tanılğan «Hizb ut-Tahrir» teşkilâtında iştirak etkenlerinde şeklenilip yaqalandı.
Kelecek kün, mayıs 13-te Rusiyege boysunğan Aqmescitteki Kiyev rayon mahkemesi yaqalanğan kişilerni iyül 11-ge qadar apiste qapatmaq qararını aldı. Mayıs 24-te Rusiyege boysunğan Qırım Yuqarı mahkemesi adliyecilerniñ şikâyetini red etti ve Enver Mamutov, Zevri Abseitov, Remzi Memetovnı iyül 11-ge qadar apiste qaldırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.