İyül 20-de, çarşenbe künü Kremlge boysunğan Aqmescitteki Kiyev rayon mahkemesi Meclis reisiniñ muavini İlmi Umerovnıñ oña qarşı açılğan cinaiy iş aqqında qararğa qarşı şikâyet muracaatını qanaatlendimedi. Bu aqta malümatnı onıñ adliyecisi Emil Kurbedinov Qırım.Aqiqatqa bildirdi.
O ayttı ki, imaye tarafı qabaatlanğannıñ aqları bir qaç bozuluvını qayd etti.
«Taqiqat obyektiv şekilde İlmi Umerov aqqında bütün malümatnı, hususan onıñ Ukraina vatandaşı olğanını qayd etmedi. Biz bunı büyük bozuluv dep sayamız. Taqiqat bunı qayd etmege red etti, ve özü eki vatandaşlıq arasında saylay bilgenini tüşündi... Bunen beraber, bu qararda bir sıra hatalar oldı. Ve biz, bu qarar alınğanda, İlmi Umerovğa onıñ aqları añlatılmağanını qayd ettik: şikâyet etme aqqı ve ilâhre», – dep ayttı Emil Kurbedinov.
İlmi Umerov
Bunen beraber o qayd etti ki, imaye mahkemeniñ bu qararına qarşı şikâyet arizasını azırlay.
«Red etüv boyunca qarar elimizdedir. Bugün onı elde ettik. Ve, elbet, buña qarşı cumhuriyetniñ Yuqarı mahkemesinde şikâyet arizasını bermege niyetlenemiz», – dep qoştı adliyeci.
İyül 20-de Aqmescitte Rusiyege boysunğan Aqmescit rayon mahkemesinde Qırımtatar Milliy Meclisi reisiniñ muavini İlmi Umerovnıñ oña qarşı açılğan «separatizm» aqqında cinaiy işinen bağlı şikâyet boyunca toplaşuv keçirildi. Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
Mayıs 19-da Qırımtatar Milliy Meclisiniñ reis muavini İlmi Umerovğa rusiyeli Federal havfsızlıq hızmetiniñ Qırım idaresinde sorğudan soñ qabaatlavnı taqdim ettiler.
Mayıs 12-de onıñ evinde tintüv keçirildi, Rusiye FSB-niñ Qırım idaresiniñ taqiqatçısı oña çıqmamaq şartını bildirgen vesiqanı berdi. Bundan soñ taqiqatçılar İlmi Umerovnı iş malümatını faş etmemesi aqqında imza qoymağa mecbur ettiler.
Rusiyeli adliyeci Mark Feygin «Memorial» uquq qoruyıcı merkezine İlmi Umerovğa siyasiy taqip etilgen statusınıñ berilmesini rica etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.