İyül 20-de Aqmescitte Rusiyege boysunğan Aqmescit rayon mahkemesinde Qırımtatar Milliy Meclisi reisiniñ muavini İlmi Umerovnıñ oña qarşı açılğan «separatizm» aqqında cinaiy işinen bağlı şikâyet boyunca toplaşuv keçirile.
Bu aqta Meclis reisiniñ birinci muavini Nariman Celâl bildire.
Toplaşuv boyunca tafsilâtlı malümat daa yoq.
İlmi Umerov
İlmi Umerov şikâyet bergeni aqqında iyül 14-te ilân etti. O vaqıt, onıñ sözlerine binaen, o, FSB taqiqatçısı adına ambulatoriyada mahkeme-psihiatrik ekspertizadan öz isteginen keçmege red etkeni aqqında arizanı berdi, bunı şahısnı itibardan tüşürme ve iş adı-sanını aşalama ıntıluvı olaraq körgenini bildirdi.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
Mayıs 19-da Qırımtatar Milliy Meclisiniñ reis muavini İlmi Umerovğa rusiyeli Federal havfsızlıq hızmetiniñ Qırım idaresinde sorğudan soñ qabaatlavnı taqdim ettiler.
Mayıs 12-de onıñ evinde tintüv keçirildi, Rusiye FSB-niñ Qırım idaresiniñ taqiqatçısı oña çıqmamaq şartını bildirgen vesiqanı berdi. Bundan soñ taqiqatçılar İlmi Umerovnı iş malümatını faş etmemesi aqqında imza qoymağa mecbur ettiler.
Rusiyeli adliyeci Mark Feygin «Memorial» uquq qoruyıcı merkezine İlmi Umerovğa siyasiy taqip etilgen statusınıñ berilmesini rica etti.