Ukrainada «BOHUN-D» şirketi qırımtatar timsallerinen, yani tamğa ve nağışnen ayaqqapnı yañıdan çıqarıp başladı. Bu modelniñ çıqarılmasını toqtatmaq qararı işhanede tünevin, Rusiye sakinleri ve işğal etilgen Qırımdaki bazı qırımtatarlar şirketke şikâyet etkeninden soñ, ilân etildi.
«Em Aqmescitten, em de Moskvadan qorquzmalar bar edi. Begenmegenler o taraftan, işğalci tarafından edi... Telefon etip, qorquza ediler. Anonim olaraq televon ete ediler. Facebookta qorquzmalar oldı. Qazandan, Moskvadan, Özbekistandan. Çeşit türlü şey yazdılar», – dep şirkette Qırım.Aqiqatqa izaat berdiler.
Ayaqqap çıqarğan şirket temsilcisiniñ sözlerine binaen, qırımtatarlarnıñ çoqusı ayaqqap çıqarılmasını toqtatmamağa rica etken soñ, modelni yañıdan istisal etmege qarar alındı. «BOHUN-D» şirketinde qayd etkenlerine köre, işbu model keñiş qullanma içün degil de, ayrı sımarış ile çıqarıla.
«Toqtatma aqqında yazğanımızdan soñ, pek çoq telefon ettiler: telefon ettiler, em şahsiy mesajlarğa yazdılar. Çoq insan qol tuta. Ve bu modelni tek onı sımarlağan qırımtatarlar içün yapamız. Tükânğa seriya çıqarmaymız. O bir yerde yoq. Adamlar saylay bile. Olar saylay ve sımarlay... Qırımtatarlar bizge tamğanı yapmağa rica etti. Deyler: «Futbolkalar bar, er şey bar. Ayaqqapta yapılsa, olmazmı?» Çıqarmazdan evel biz başta soradıq», – dep añlattılar şirkette.
Böyle ayaqqapnıñ fiyatı – 680 grivna, dep yazalar işhaneniñ Facebook saifesinde.
Qırımtatar bayrağı, üstünde altın tamğa olğan kök tüsteki ketenden ibarettir.