Rusiye kontrol etken Qırım parlamenti «Qırım ealisine nisbeten yapılğan er angi ekstremizm ve terrorizm şekillerini» takbih etmege çağıra. Bu aqqında Qırımnıñ Rusiye parlamenti iyül 8-de qabul etken beyanatında aytıla. Deputatlar Qırımtatar Milliy Meclisi telükeli olğanını qayd eteler.
«Qırım Cumhuriyetiniñ Devlet şurası terrorizm ile bağlı ve «Qırımtatar Milliy Meclisi» adını taşığan cemaat birleşmesi ve hadimleri tarafından teşkil etilgen cinayetler ve terrorist taqımlarnıñ artqan faaliyeti, ekstremist areketler sebebinden qasevetlene», – dep aytıla beyanatta.
Vesiqada qırımtatarlarnıñ lideri Mustafa Cemilev ve Meclis reisi Refat Çubarovnıñ ukrain matbuat vastalarında aydınlatılğan işğal etilgen Qırımğa dair fikirleri qayd etile.
Qırım deputatları ticaret ve energetik qamaçavnı qayd etip, onıñ teşkil etilmesi Meclis azalarınen bağlı olğanını aytalar.
«Deñiz qamaçavı planları aqqında laflar qasevetlendire, deñiz qamaçavı 14.12.1974 Birleşken Milletler Teşkilâtı Baş Assambleyasınıñ 29-ıncı sessiyasında qabul etilgen Rezolütsiyanıñ «İstilâ ıstılasına» köre, istilâ sayıla ve halqara mesülietke çekilmesini belgiley», – dep aytıla vesiqada.
Qayd etile ki, Qırımnıñ Rusiye parlamenti «siyasiy, iqtisadiy, içtimaiy, milletlerara, dinlerar ve diger meselelerniñ al etilmesi içün ekstremizm, terrorizm yollarını takbih ete ve Qırım Cumhuriyeti Yuqarı Mahkemesiniñ «Meclisni» ekstremist teşkilât olaraq tanıp, faaliyetini yasaq etmek qararına qoltuta».
«Qırım Cumhuriyetiniñ Devlet Şurası dünya toplulığına muracaat etip, Meclis ve onıñ qurğan silâlı birleşmelerine bir de bir maneviy, maddiy, tehnik yardım köstermemege çağıra», – dep aytıla beyanatnıñ soñunda.
Devletini, halqını satqan, halqara uquqqa köz yumğan, Qırım ve onıñ sakinlerini iqtisadiy haosqa oğratqan şahıslar yapqan cinayetleri içün ceza çekeceklerini añlaylarRefat Çubarov
Qırımtatar Milliy Meclisiniñ reisi Refat Çubarov Rusiye kontrol etken Qırım parlamenti deputatlarınıñ iyül 8-de Mecliske qarşı qabul etken beyanatlarını izaatlap, «işğalci akimiyet telâşlanmağa başlay», dep ayttı.
«Eki yıl evelsi devletini, halqını satqan, halqara uquqqa köz yumğan, Qırım ve onıñ sakinlerini iqtisadiy haosqa oğratqan şahıslar yapqan cinayetleri içün ceza çekeceklerini añlaylar», – dep yazdı Çubarov Facebookta.
Onıñ fikirince, Qırım Rusiye parlamentiniñ Mecliske qarşı beyanatı «Qırım cemaatınıñ diqqatını yaşayışnıñ er saasında vaziyet kerginleşkeninden uzaqlaştırmaq içün» qabul etildi.
Çubarov NATO sammitiniñ ekspertler forumı toplaşuvında iştirak etip, Qırım mıtlaqa azat etilmeli dedi.
Meclis reisiniñ birinci muavini Nariman Celâl bildire ki, Kreml kontrol etken Qırım parlamenti deputatlarınıñ Qırımtatar Milliy Meclisine qarşı beyanatı manasız olıp, halqara toplulıq içün iç bir şey ifade etmey. Onıñ aytqanına köre, iyül 8-de qabul etilgen beyanat – «em menim, em de, eminim, halqara toplulıq içün boş laf».
Nariman Celâl
Meclis reisiniñ birinci muavini qayd etti ki, OSCE rezolütsiyası, em de Avropa parlamenti ve Birleşken Milletler Teşkilâtınıñ aynı vesiqaları bunı isbatlay. Olar ise «Mustafa Cemilev, Refat Çubarov ve diger ortaq ve dostlarımıznıñ faal halqara faaliyetleri sayesinde» qabul etildi.
Celâlnıñ fikirince, işğal etilgen Qırımda qabul etilgen vesiqa keç qalıp, «Qırım akimiyetiniñ toqtamağan hataları vaziyetinde bu yañlışlarnıñ baş «qabaatlısı» kim olğanını işaretlemek içün» yapılğan.
Bu beyanat – em menim, em de, eminim, halqara toplulıq içün boş lafNariman Celâl
«Bunı vesiqanıñ qabul etilgen künü isbatlay – Rusiye prezidenti «Yarovayanıñ paketini» imzaladı ve Varşavada NATO sammiti keçirile, Cemilev ve Çubarov anda iştirak eteler», – dep qayd etti Celâl.
O, «Satqınlarğa boykot» halq flash mobunı» devam ettirmege çağırdı.
Aprel 26-da Rusiye kontrol etken Qırım Yuqarı mahkemesi yarımadada Meclis faaliyetini yasaq etti. Dünya toplulığı Rusiye akimiyetiniñ yapqanlarına sert bir cevap berdi.
Meclis imayesi Rusiye Yuqarı mahkemesine apellâtsion şikâyetini berdi, faqat şikâyet baqılacaq künü şimdilik belli degil.
Rusiye hızmetleri 2014 senesi yarımada Rusiye tarafından işğal etilgen soñ Mustafa Cemilevniñ Qırımğa kirişini yasaq etti. Beş yıllıq kiriş yasağı Qırımtatar Milliy Meclisiniñ reisi Refat Çubarovğa da berildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.