Birleşken Milletler Teşkilâtınıñ qaçaqlar işlerinden agentliginiñ (UNHCR) malümatına köre, al-azırda Ukrainada 1,7 milliondan ziyade mecburiy köçip kelgen kişi qayd etile, çoqusı da esli-başlı adamlar eken.
«Şimdi 1,7 milliondan ziyade memleket içinde köçip kelgenler qaydlı, esasen bu esli-başlı adamlar. Olardan çoqusı er şeyden marum qaldı ve yardımğa muhtac. Akimiyet olarnıñ qorumasını temin etmeli ve aq-uquqlarına riayet etilmesi ile içtimaiy yardımğa maniasız irişimni kefil etmeliler», – dep ayttı Birleşken Milletler Teşkilâtınıñ qaçaqlar işlerinden agentliginiñ (UNHCR) qoruma meseleleri baş mesleatçısı David Karp.
UNHCR ile Dnepr uquq qorçalayıcılarınen beraber yapılğan matbuat konferentsıyasında qayd etilgeni kibi: Ukrainada memleket içinde köçip kelgenlerniñ esas meselelerinden biri devlet tölemeleriniñ maliye etilmesinen bağlı.
«Adliyeciler şirketi ve memleket içinde köçip kelgenlerge uquqiy yardım» leyhasınıñ Dnepr ofisi reberi Sergey Çagovtsanıñ aytqanına köre, soñki aylar devamında köçip kelgenlerniñ teşkerüvleri olardan bazıları içün nefaqa ve içtimaiy tölemelerniñ toqtatılmasınen bitti.
Adliyeciniñ añlatqanlarına köre, iyün 8-de Ukraina Nazirler şurası № 637 avalesine deñişmeler qoştı. Bu qarar memleket içinde köçip kelgenlerniñ ilâve teşkermelerini keçirmek temel berdi. Mahsus yaratılğan işçi gruppaları köçip kelgenlerniñ qayd yerlerini teşkermege ve mal-maişet şartlarına qıymetini kesmege ve senetini tizmege aq bere, bu senetniñ temelinde soñ nefaqa ve içtimaiy yardım aqqında qarar tayin etilecek.
İçtimaiy siyaset nazirliginiñ malümatına köre, 2016 yılınıñ iyün 29-na köre Donbasstan ve Qırımdan köçip kelgen 1 788 527 kişi bar.