Qırımtatarlarnıñ liderleri iyün 28-de aqşam İstanbul ava limanında yüz bergen patlavlarnı takbih ettiler. Qırımtatar Milliy Meclisiniñ reisi Refat Çubarov İstanbul ava limanında terakt neticesinde elâk olğanlarnıñ tuvğanları ve yaqınlarına taziyelerini bildirip, «türk milletine birlik ve metin olmağa tiledi».
«Terrornı tışqı siyasetine çevirgen ve Birleşken Milletler Teşkilâtında devlet terrorizm aqqını aqlağan devletler bar olğanına qadar iç kimse ne ayrı, ne de taqım terrorını toqtatamaz, añlaysıñızmı? Terrorizmniñ er angi şekli cezalanmalı... Qomşularını istilâ etken ve topraqlarını işğal etken memleketler terrorizm ile küreşmege çağırğan olsa, bunı afu etilmeycek hata, atta cinayet dep saymaq kerek», – dep yazdı Çubarov Facebookta.
Ukraina prezidentiniñ qırımtatar halqı işlerinden vekâletlisi, halq deputatı Mustafa Cemilev Facebookta İstanbul ava limanında olıp keçken terakt qurbanlarınıñ tuvğanları ve yaqınlarını taziyelerini bildirdi.
Türkiyedeki Ukraina elçihanesi iyün 28-de aqşam İstanbul ava limanında kerçekleştirilgen patlavlarnı «terrornıñ varvar ücümi» dep adladı.
Dünya liderleri ve BMT Türkiyedeki teraktnı takbih ettiler.Soñki bir qaç ay içinde Türkiye bir sıra ücümge oğradı. Kurd boyevikleri ve «İslâm devleti» ekstremist taqımları ücüm kerçekleştirilmesi ile qabaatlana.
Soñki resmiy malümatqa köre, İstanbul ava limanındaki ücüm neticesinde eñ azından 36 kişi elâk oldı ve 147 insan yaralandı. Kimse ücüm mesülietini öz boynuna almadı. Türkiye baş naziri Binali Yıldırım bildirdi ki, ava limanındaki terakt mart ayında Brüsselde «İslâm devleti» kerçekleştirgen ücümge oşay.