Bazar künü, iyün 26-da, esas Ukraina ve Qırımda Qırımtatar bayraq künü tedbirleri olıp keçti. Bir qaç yüz faal Kyiv merkezinde 39 metrlik qırımtatar bayrağı ile yürüş yaptı. Bunı Qırım.Aqiqat mühbiri bildire.
Aktsiya teşkilâtçılarınıñ bildirgenine köre, ellerinde olğan bayraq dünyanıñ eñ büyük bayrağıdır. Onıñ uzunlığı 6 metr ve keñligi 39 metr, 40 küçük bayraqtan tikilgen bayraqnı Türkiyeden mahsus bayramğa ketirgenler.
Bu büyük bayraq Türkiyeden, Ankaradan ketirildi. Teşebbüs qırımtatar diasporamızğa aitEskender Bariyev
«Bu büyük bayraq Türkiyeden, Ankaradan ketirildi. Teşebbüs qırımtatar diasporamızğa ait. Olar bayraqnı tikip yollağanlar. Bundan ğayrı, onıñ temsilcileri mında. Olar Kyivge kelgenler», – dep ayttı Qırımtatar Milliy Meclisiniñ azası Eskender Bariyev Qırım.Aqiqatqa.
Dünyada eñ büyük qırımtatar bayrağı
Kolonnanıñ başında qırımtatar halqınıñ lideri, Ukraina halq deputatı Mustafa Cemilev bar edi.
Qırımtatar bayrağı – işğalge qarşı çıqqanımıznıñ bir timsalidirMustafa Cemilev
«Qırımtatar bayrağı – işğalge qarşı çıqqanımıznıñ bir timsalidir, yalıñız qırımtatarlar içün degil, Qırımnıñ azat etilmesi oğrunda küreşken bütün milletler içün öyle. Aynı vaqıtta bayraq ukrain halqınıñ qırımtatar cemiyetinen Qırımnıñ azat etilmesi küreşinde birleşkenini ifade ete», – dep qayd etti Mustafa Cemilev Qırım.Aqiqatqa bergen izaatında.
Mustafa Cemilev Qırımtatar bayraq kününde
Qırımtatar Milliy Meclisi reisi Refat Çubarov, sabıq siyasiy mabus Gennadiy Afanasyev, Ukraina haber siyaseti naziriniñ birinci muavini Emine Ceppar aktsiyağa qoşuldılar. Yürüş iştirakçileri arasında Qırım, Lviv, Ankara ve İstanbuldan kelgen qırımtatarlar da bar edi.
Mustaqillik Meydanında yürüş kontsert ve mitingge çevirildi, Ukraina ve qırımtatar milliy gimni seslendirildi.
Qırımtatar bayraq künü bir qaç yıl evelsi Qırımda qayd etilmege başladı. Bayram künü olaraq 1991 senesi iyün 26-27 künleri Aqmescitte toplaşqan ekinci Qırımtatar Milliy Qurultayınıñ birinci künü belgilendi.
Your browser doesn’t support HTML5
Qırımtatarlar Kiyev merkezinde dünyada eñ büyük milliy bayraqnen yürüş keçirdi (video)
«Eki bayraq – bir devlet!»
Ukraina prezidenti Petro Poroşenko ve baş naziri Volodımır Groysman qırımtatarlarnıñ Qırımtatar bayraq kününi tebriklediler.
«Eki bayraq – bir devlet!», – dep aytıla Ukraina prezidentiniñ Facebook saifesinde.
«Dostlar, can-yürekten Qırımtatar bayraq kününi hayırlayım!», – dep aytıla Volodımır Groysmannıñ Facebook saifesinde.
«Umma» Ukraina musulmanları diniy idaresiniñ müftisi Said İsmagilov da qırımtatarlarnı hayırladı.
«Qırımtatar qardaşlarım – Qırımtatar bayraq künüñiz hayırlı olsun! Güzel bayrağıñız Ukraina terkibindeki Qırımtatar milliy muhtariyetiniñ resmiy bayrağı olıp, Qırımnıñ er bir binasında Ukraina bayrağınıñ yanında yelpiresin isteyim», – dep yazdı İsmagilov Facebookta.
«Biz qaytqan soñ»
Qırımtatar bayraq künü munasebetinen 12 qırımlı – siyasetçi, medeniyet erbabı, jurnalist ve cemaat faalleri Lilâ Bucurovanıñ «Biz qaytqan soñ» şiirini Qırım.Aqiqat içün oqudı.
Qırım.Aqiqat leyhasında iştirak etkenler arasında Qırımtatar Milliy Meclisiniñ reisi Refat Çubarov, qırımlı, siyasiy mabus Gennadiy Afanasyev, oyuncı ve rejisser Galina Cikayeva, cemaat faali Tamila Taşeva, tarihçı Gülnara Bekirova, Radio Svobodanıñ Qırım.Aqiqat leyhası reberi Volodımır Prıtula bar.
Qırımtatar şairesi ve jurnalisti Bucurovanıñ «Biz qaytqan soñ» şiiri 1989 senesi aynı adını taşıp çıqqan şiirler cıyıntığına kirmekte.
Your browser doesn’t support HTML5
«Biz qaytqan soñ» – qırımlılar Lilâ Bucurovanıñ şiirini oquy (video)
Yalıñız timsaller degil
Qırımda Qırımtatar bayraq künü munasebetinen faaller Qırımnıñ şeer ve köylerine eski adlarınıñ qaytarılması içün flash mob başlattılar.
Faaller oturğan yerleriniñ tarihiy adlarını kâğıtqa yazıp foto çıqarğanlar. Faallerniñ bildirgenine köre, aktsiyanıñ maqsadı – Qırım şeer ve köyleriniñ adlarını qayd etmektir.
Flash mob iştirakçileri fotoresimlerini içtimaiy ağlardaki saifelerine qoyalar. Qırımtatar Milliy Meclisi reisiniñ muavini İlmi Ümerov da aktsiyağa qoşuldı.
Qırımtatar faalleri Milliy bayraq künü munasebetinen flash mob keçirdiler (fotoresimler)
Qırımtatar bayraq kününe bağışlanğan aktsiyalar esas Ukrainanıñ şeerlerinde de olıp keçti.
Zaporojye şeerinde aktsiya iştirakçileri şeerniñ merkeziy meydanında Ukraina ve qırımtatar bayraqlarınıñ resimlerini yapıp, qırımlılarğa olğan tileklerini yazdılar.
Hersonda ise avtoyürüş olıp keçti. Aktsiya şeerniñ merkeziy meydanında başladı. Qırımtatar ve Ukraina bayraqları olğan maşinalar kolonnası Hersonnıñ merkeziy soqaqlarından keçti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.