Qırımtatar Qurultayı Merkeziy saylav komissiyasınıñ reisi Zair Smedlâyev qırımtatarlarnı yarımadada iyün 26-da qayd etilgen Qırımtatar bayrağı kününi öz küçünen keçirmege çağıra. O, Rusiyege boysunğan Qırım ükümeti bu künni kerekli seviyede qayd etmege bermeycekler, dep emin olğanını qayd etti.
«Añlayım ki, mında, Qırımda, ükümet bayrağımıznı tüşürmek, halqımıznı aşalamaq ve kütleviy merasimlerni keçirmege bermemek içün elinden kelgenini yapar. İşte, imkânımızğa köre faaliyet alıp baracamız!» – dep yazdı Smedlâyev Facebook saifesinde.
«Vaqıt olğance, fleşmoblarğa qoşulıñız ve yarışlarda iştirak etiñiz. Balalarıñıznı bayrağımıznen fotoğa çıqarıñız, özüñiz de yaşağan meskün yerleriñizde olarnıñ tarihiy adlarıı ile foto çıqarıñız! Öz bayrağını ğururnen elinde tutqan halq yaşağance, onıñ kelecegi olacaqtır!» – dep qayd etti o.
Smedlâyevniñ qayd etkenine köre, aynı bu kün, iyün 26-da Qırımda «Hizb ut-Tahrir» teşkilâtınen bağlı olğanında qabaatlanıp apiste bulunğan Emir-Usein Kuku 40 yaşını tolduracaq.
Qırımtatar bayrağı kününe bağışlanğan merasimler Kiyevde ve Herson vilâyetinde de keçirilecek. Programma çerçivesinde resim yarışı, avto yürüş ve vatanperverlik mitingi teşkil etilecek.
Qırımtatar bayrağı künü bir qaç yıl evel Qırımda qayd etilip başladı. Bayram künü, 1991 senesi iyün 26-27 künleri Aqmescitte keçirilgen ekinci Qırımtatar Qurultayınıñ ilk künü olğan kün belgilendi.
Qırımtatar bayrağı, üstünde altın tamğa olğan kök tüsteki ketenden ibarettir.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.