Odessa vilâyetindeki İzmail şeer yolbaşçısı Andrey Abramçenkonıñ ilân etkenine köre, şeerde adamlarnıñ kütleviy şekilde hastalanmasınıñ sebebi «miks-infektsiya» oldı. Bu aqta o, Facebook saifesinde yazdı.
«Laboratoriya tedqiqiy işleri neticesinde İzmailde miks-infektsiya bar olğanı belgilendi. Rotavirus infektsiyası, novovirus infektsiyası ve içekler tayaçığı tapıldı», – dep yazdı şeer yolbaşçısı.
Onıñ sözlerine köre, bu, şiddetli sağanaqlar sebebinden bulaşma neticesinde oldı.
Bazar künü Abramçenko hastahanelerge 362 insan muracaat etkenini, olardan 220 bala olğanını bildirdi.
Adamlarnıñ kütleviy şekilde zeerlenüvi boyunca cinaiy iş açıldı.
Şeerde fevqulade vaziyet ilân etildi. Hastalar İzmail hastahanelerine iyün 17-de tüşmege başladı. İnfektsiya hastahanesinden yardım sorağanlar yürek bulanuvı, qusma, sıcaq köterilmesi ve mide bozğunlığına şikâyet etkenler. Hastalarnı baqqan soñ, ekimler «keskin içekler infektsiyası» diagnozını qoydılar. Tahminlerge köre, zeerlenüv sebebi suv ola bile, çünki yaqında şeerde şiddetli yağmurlar yağdı, neticede İzmailnıñ bir qısmında şahsiy quyular suvğa battı, bundan da ğayrı, şahsiy rayonda ayaqyollar bozuldı.