Ukraina prezidenti Petro Poroşenko Avropa parlamenti yolbaşçısı Martin Şults ile telefon lafını keçirdi, onıñ çerçivesinde işğal etilgen Qırım ve Donbassnıñ qısmı meseleleri muzakere etildi.
Bu aqta ukrain yolbaşçısınıñ matbuat hızmeti bildire.
«Subetdeşler, Donbasstaki vaziyetni de muzakere etti ve kelecekte Rusiyege qarşı sanktsiya basımını devam ettirmek maqsadınen imkânlarnı qullanmağa devam etmesiniñ müimligini qayd etti, sanktsiyalar ise, Ukraina Donbass ve Qırımda öz nezaretini keri tiklegenine qadar amelde olmaq kerek», – dep aytıla beyanatta.
Martin Şults bundan evel Avropa birliginiñ Rusiye ile işbirligi tek Qırımnıñ Ukrainağa qaytarılmasından soñ ola bilecegini ilân etken edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.