Azatlıq Radiosı 1953 – 1995 senelerine ait olğan malümatlarnen öz arhivlerini aça. Endi er istegen insan, istegen vaqıtta Azatlıq Radiosınıñ arhivini qullana bile.
«Bugünki künde, Rusiye vatandaşları RFE/RL ve Azatlıq Radiosına aqiqiy malümat menbasına kibi işanğan vaqıtta, bu arhiv programmalarınıñ ayrı emiyeti peyda ola» – dep bildirdi Azat Avropa Radiosı/Azatlıq Radiosı korporatsiyasınıñ baş muarriri Nenad Peiç.
OSA (Open Society Archives) arhiviniñ binası Budabeşt merkezindeki Yanoş Arani soqağında, sabıq tikme işhanesiniñ binasında buluna. Arhiv Orta Avropa universitetiniñ mülkiyetinde buluna.
OSA arhiviniñ tarihı «suvuq cenk» vaqtında, o zaman yasaq olğan edebiyatnıñ derc etilmesinden başlandı. Müdir İştvan Revniñ añlatqanına köre, bugünki künde de arhiv yasaq olğan edebiyatnı tertipke ketirüvnen oğraşa.
«Kollektsiyamıznıñ eñ zengin qısmı, bu mühbirler radioda, hususan Azatlıq Radiosında çalışqan vaqıtta qullanğan malümattır. Yazılı malümatlardan ğayrı, bizim teşviqat filmleriniñ büyük, belki, dünyada eñ büyük sayılğan, toplamımız bar», – dep ayttı İştvan Rev.
Şimdiki vaqıtta OSA arhivi «Azatlıq Radiosınıñ Münhen fayllarınıñ» derc etilmesine azırlana.