Geniçeskte qırımtatar halqı sürgünliginiñ yıllığında olıp keçken matem mitinginiñ iştirakçileri Ukraina prezidenti ve parlamentini 2016 senesiniñ soñuna qadar qırımtatar halqınıñ kelecegini belgilemek aqqını tasdıqlaycaq deñişmelerni Anayasağa kirsetmege çağırdılar. Bu aqqında miting rezolütsiyasında aytıla, dep haber ete Qırım.Aqiqat mühbiri.
«Ukraina prezidenti, Ukraina Yuqarı Radasını bu deñişmelerni 2016 senesiniñ soñuna qadar kirsetmege çağıramız», – dep aytıla rezolütsiyada.
Vesiqada Rusiye Federatsiyasından işğal etilgen Qırımda «insan aqları ve serbestligine qarşı yönelgen siyasetni», hususan qırımtatarlarğa qarşı areketlerni toqtatmağa talap etile.
Miting iştirakçileri Rusiyeden Qırım siyasiy mabuslarını azat etmesini, em de yarımadağa insan aqları vaziyetini ögrenecek halqara missiyanıñ almasını talap ettiler.
Miting bitken soñ onıñ iştirakçileri «Çonğar» tarafına yol aldılar.
Er yıl Qırımda sürgünlik kününe bağışlanğan kütleviy tedbirler keçirile edi, şu cümleden matem mitingi. Amma 2014 senesi mart ayında Rusiye yarımadanı işğal etken soñ böyle bir tedbirlerniñ Aqmescit merkezinde keçirilmesi yasaq etildi. Qırımtatar Milliy Meclisi bildirdi ki, Qırımdaki regional meclisler Rusiye kontroli altında bulunğan akimiyet mayıs 18 qırımtatar sürgünligi yıllığında matem tedbirleriniñ keçirilmesine izin alamaylar.
Bundan sebep Meclis yarımadadaki semetdeşlerine hatıra yerlerinde sürgünlik qurbanlarını dua ile añmağa tevsiye ete.
1944 senesi yarımadan Orta Asiyağa qırımtatarlarnıñ birinci eşelonı yollandı. Cemi olaraq tahminen 180 biñ insan sürgün etildi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.