Ukraina Yuqarı Radası Birleşken Milletler Teşkilâtı, Avropa parlamenti, PACE, OSCE ve dünya liderlerine qırımtatar halqınıñ genotsidi qurbanlarını tantanalı şekilde añmaq ve Rusiye tarafından qırımtatar halqınıñ aqları ve serbestligi bozulmasını takbih etmek muracaatını qabul etti.
Mayıs 11-de mütenasip qararnı qabul etmek içün 240 halq deputatı rey berdi. Oña «Muhalif bloku», «Vidrodjennâ» ve Radikal firqa deputatlarınıñ çoqusı qol tuttı.
Öz muracaatında ukrain parlamenti halqara toplulıqnı 1944 senesi qırımtatar halqınıñ sürgünligini genotsid olaraq tanımağa ve mayıs 18-de keçirilecek qurbanlarnı tantanalı şekilde añmasına qoşulmağa davet etti.
Bundan da ğayrı, Yuqarı Rada halqara teşkilâtlarnı Rusiye ükümetiniñ Meclis faaliyetini yasaq etmek qararını ve qırımtatar halqınıñ aqlarını bozğanını takbih etmege çağıra. İşbu bozuvlarnı parlament öz beyanatında «etnotsid» dep adlandıra.
«Qırımtatar halqına daimiy basım, vaqtınca işğal etilgen Ukraina territoriyasında Rusiye Federatsiyası tarafından işğal vaqtından başlap yapılğan Ukraina vatandaşlarına qarşı repressiyalar, qırımtatarlarnıñ, olarnıñ Qırımtatar Milliy Meclisi ve Qırımtatar Qurultayı kibi organlarınıñ etnik ve siyasiy maqsatlarnen taqip etilmesi, qırımtatar halqına qarşı alıp barılğan etnotsid siyaseti ola», – dep aytıla beyanatta.
1944 senesi mayıs 18-de Orta Asiyağa Qırımdan qırımtatarlarnen ilk eşelon yollanıldı, umumen olaraq, 180 000-den ziyade insan sürgün etildi.
2016 senesi aprel ayında Rusiyege boysunğan Qırım Yuqarı mahkemesi yarımadada Qırımtatar Milliy Meclisiniñ faaliyetini yasaq etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.