Qırımtatar halqınıñ meseleleri boyunca Ukraina prezidentiniñ vekâletlisi, halq deputatı Mustafa Cemilev işğal etilgen Qırımda rusiyeli uquq qoruyıcıları tarafından qanunsız yaqalanğan qırımtatarlarnıñ cedvelini halqqa bildirdi. Bu cedvelni Cemilev Facebook saifesinde paylaştı.
«Rusiye tarafından vaqtınca işğal etilgen Qırımda bulunğan Federal havfsızlıq hızmeti ve Rusiye Taqiqat komitetinde bulunğan siyasiy mabuslarnıñ – 14 qırımtatarnıñ cedveli», – yazdı Cemilev.
Beyanatqa binaen, cedvel başında Qırımtatar Milliy Meclisiniñ reis muavini Ahtem Çiygoz tura, o apiste 2015 senesinden başlap buluna. Qırımda rusiyeli uquq qoruyıcılar tarafından yaqalanğan kişiler arasında qırımtatarlar Rustem Vaitov, Ruslan Zeytullayev, Nuri Primov, Ferat Sayfullayev, Ali Asanov, Mustafa Degermenci, Muyedin Alvapov, Refat Alimov, Arsen Ceparov, Emir-Usein Kuku, Enver Bekirov, Muslim Aliyev ve Vadim Siruk.
Qırım Rusiye tarafından işğal etilgen soñ yarımadada qırımtatar faalleri taqip etilmege başladı. Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Meclis reisiniñ muavini Nariman Celâl Meclisniñ yarımadada yasaq etilmesi şimdilik qırımtatarlarnıñ yaşayışına tesir etmegenini bildirdi.
Bundan evel halqara toplulıq Mecliske qarşı yapılğan Rusiye ükümetiniñ areketlerini takbih etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.