Rusiyege boysunğan Qırım Yuqarı mahkemesiniñ Meclis faaliyetini yarımadada yasaq etmek qararı qırımtatarlarnıñ yaşayışına daa tesir etmedi. Bunı Qırım.Aqiqatqa Qırımtatar Milliy Meclisiniñ reis muavini Nariman Celâl bildirdi.
«Şimdilik deñişmeler yoq, yaqın vaqıtta olarnı beklemek kerekmey. Amma jurnalistlerden biri, mence, pek manalı ayttı ki, «ükümet özüne avlanmaq içün litsenziya yaptı». Yani bu, kelecekte bütün hoşuna kelmegen şahıslarnı nasıldır yolnen Meclisnen bağlap, olarğa cinaiy qanunlar ceetinden tesir etmek içün imkândır. Bunıñ nasıl olacağını biz daa bilmeymiz», – qayd etti Celâl.
Bundan evel Nariman Celâl Meclis adliyecisi mahkeme qararını alâ daa elde etmegenini bildirgen edi. Meclis, qararnen tanış olacağından soñ, onı lâğu etmek içün muracaat etmege niyetlene.
Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.
Halqara toplulıq Rusiye ükümetiniñ Meclis faaliyetini yasaq etmek qararını takbih etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.