Rusiyede terroristik teşkilâtı olaraq tanılğan «Hizb ut-Tahrir» teşkilâtında iştirak etkeninde şeklenilip yaqalanğan Refat Alimovnıñ işi İnsan aqları boyunca Qırım kontakt gruppasınıñ daimiy nezaretinde bulunacaq. Bu aqta gruppa idarecisi Abdureşit Cepparov bildirdi.
Uquq qoruyıcı mayıs 1-de Qızıltaş köyünde yaşağan musulman Refat Alimovnıñ qorantasını ziyaret etti.
«Bütün bar olğan imkânlarımıznı sizge yardım etmek içün qullanacaqmız», – dep vade etti o yaqalanğan kişiniñ soy-soplarına.
Qırım kontakt gruppasınıñ yolbaşçısınen körüşüvge Refat Alimovnıñ em yaqınları, em de dostları toplaştı. Abdureşit Cepparov bu yerde bulunğanlarnıñ aytacaqlarını diñledi, olarnıñ istekleri aqqında haber aldı, kelecekte nasıl areketler yapa bilecegi aqqında tevsiyeler berdi.
Aprel 12-de Federal havfsızlıq hızmeti Refat Alimovğa qarşı cinaiy iş açtı, amma onıñ qorantası bu aqta beyanatnı Refat endi yaqalanğan soñ, aprel 23-te aldı.
Rusiye uquq qoruyıcıları aprel 18-de yigit yaşağan evde tintüv keçirdi. Ondan sistem blokını, diniy filmler ile disklerini aldılar, ve onı Federal havfsızlıq hızmetiniñ Qırım idaresine alıp kettiler. Şimdiki vaqıtta o Aqmescitteki SİZO-da buluna.
Köydeşler Refat Alimov aqqında yahşı seslene ve oña destek köstermek içün imza topladılar. İş yerinden hasiyetname onıñ anası aytqan sözlerini tasdıqlay, o özüni bütünley işke bere edi. Ticariy temsilci olıp, işhane seviyesini köterdi, işdeşler onı ürmet ete edi, o iş intizamını bozmay edi.
Характеристика с места работы Рефата Алимова
Refat qorantanıñ yekâne qazanğan baqıcısıdır.
Aprel 18-de, bazarertesi künü, Qızıltaş köyünde (Yalta) Rusiye uquq qoruyıcıları tintüv keçirip, eki qırımtatarı - Refat Alimov ve Arsen Cepparovnı yaqaladılar. Rusiyege boysunğan Qırım prokurorı Natalya Poklonskaya aprel 18-de Yaltada «Hizb ut-Tahrir» ile bağda olğanında şeklengen eki insan yaqalanğanını bildirdi.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Dörtü de Aqmescitte SİZOda yatalar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.