Rusiyege boysunğan Qırım Yuqarı mahkemesiniñ yarımadada Meclis faaliyetini yasaq etmek qararı Ukraina ve dünyada qırımtatarlarğa destek daa ziyade olacağına yol berecek. Bu aqta Ukraina baş naziri Vladimir Groysman bildirdi.
«Rusiye Federatsiyası nevbetteki añlaşılmağan qararnı qabul etti: işğal etilgen Qırımnıñ «yuqarı mahkemesi» Meclis faaliyetini ekstremistik teşkilâtı olaraq yasaq etti. Bu kibi teatr-mahkeme sanalaştırmaları tek bizim qırımtatarlarğa nisbeten destegimizni yükselte bile. Eminim ki, halqara toplulıq bu vaqiağa mütenasip şekilde qıymet kesecek, ve Kremlde bunı ne derecede istemeseler de – Qırımğa ukrain ükümeti, Meclisniñ serbest faaliyeti ve insan aq-uquqlarınıñ saqlanması mıtlaqa qaytacaq», – dep yazdı nazir Facebook saifesinde.
Rusiyege boysunğan Qırım Yuqarı mahkemesi aprel 26-da yarımada territoriyasında Qırımtatar Milliy Meclisiniñ faaliyetini yasaq etmek qararını qabul etti. Bu qararnı lâğu etmek içün bir ay devamında muracaat etmek mümkün.
Dava boyunca cevapkâr – Qırımtatar Milliy Meclisi reisiniñ birinci muavini Nariman Celâl Meclis azaları şikâyet arizasını berecegini ilân etti.
Aprel 18-de Rusiye Adliye nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Böyle qarar Ukraina, bir sıra halqara teşkilâtlar ve uquq qoruyıcılar tarafından takbih etildi.
Rusiye prezidentiniñ matbuat kâtibi Dmitriy Peskov yarımadada Qırımtatar Milliy Meclisiniñ yasaq etilmesi meselesi «Rusiyeniñ içki işi» olğanını, ve Rusiye tıştan kelgen «tevsiyelerni» diñlemeycegini ilân etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.