Adalet nazirligi Qırımtatar Milliy Meclisini ekstremist faaliyetinden sebep yasaq etilgen teşkilâtlar cedveline kirsetti. Bu aqqında nazirlikniñ saytında aytıla.
«Qırımtatar Milliy Meclisi» cemaat teşkilâtı ekstremist faaliyetinden sebep yasaq etilgen cemaat ve din teşkilâtları sırasına kirsetildi», – dep aytıla haberde
«Qırımtatar Milliy Meclisi» cemaat teşkilâtı ekstremist faaliyetinden sebep yasaq etilgen cemaat ve din teşkilâtları sırasına kirsetildi», – dep aytıla haberde.
Berilgen malümatqa köre, bu qarar aprel 18-de Adalet nazirligi tarafından «Qırım Cumhuriyeti prokurorınıñ cemaat teşkilâtınıñ faaliyetini toqtatmaq qararı esasında» qabul etildi.
Aprel 13-te Kreml tayin etken Qırım prokurorı Natalya Poklonskaya bildirdi ki, Qırımtatar Milliy Meclisiniñ faaliyeti yarımadada mahkeme qararı olmadan yasaq etile.
Ukraina Tış işler nazirligi Rusiye akimiyetiniñ Meclis faaliyetini yasaq etmek içün yapqan areketlerine narazılıq bildirdi. Birleşken Milletler Teşkilâtı Rusiye Federatsiyasını Qırımda Qırımtatar Milliy Meclisiniñ yasaq etilmesine yol bermemege çağırdı. Avropa Birligi Meclis faaliyetini yasaq etmek niyetlerinden qasevetlengenini bildirdi.
Cuma künü, aprel 15-te, Qırımda Meclis yasaqlanması mahkemesi olıp keçti, nevbetteki toplaşuvnıñ keçirilmesi aprel 25 kününe belgilendi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.