Qırımtatar Milliy Meclisiniñ reisi, Ukraina halq deputatı Refat Çubarov Azerbaycannıñ Ermenistanğa qoltutqan separatist regionı Dağlıq Qarabağdaki arbiy zıddiyetni izaatlap, Ukraina Azerbaycan ve mustaqilligi bozulğan diger memleketlerniñ topraq bütünligine qoltutmaq kerek, dep qayd etti.
«Ukraina Azerbaycan, Gürcistan, Moldovanıñ topraq bütünligine qoltutmağa devam etmeli..., olarnıñ mustaqilligi Moskvanıñ areketlerinden sebep bozuldı», – dep yazdı o Facebookta.
Cumaertesine keçer gecesi, aprel 2-de, Dağlıq Qarbağdaki vaziyet kerginleşti. Ermenistan ve Azerbaycan tarafı bir-birini ağır silâ qullanmasınen ücüm etkenleri ile qabaatladı. Ermenistan prezidenti Serj Sargsân 18 ermeni askeriniñ vefat etkenini aydınlattı. Azerbaycan akimiyeti 12 asker ve bir vatandaşnıñ elâk olğanını bildirdi. Azerbaycannıñ Ermenistanğa qoltutqan separatist regionı Dağlıq Qarabağda eki vatandaş, biri 12 yaşında oğlançıq elâk olğanı bildirildi.
Aprel 3-te Azerbaycan Mudafaa nazirligi Baku Qarabağ zıddiyeti alanında arbiy areketlerni toqtatqanını ilân etti. Ealiniñ ekseriyeti ermeni olğan Dağlıq Qarabağ 1991 senesi Azerbaycan terkibinden çıqqanını ilân etti. Bundan sebep silâlı zıddiyet yüz berdi, bunıñ neticesinde Azerbaycan topraqnı nezaret etemey.