Rusiyege boysunğan Qırım ükümetindeki Milletlerara munasebetler ve sürgün olunğan grajdanlarnıñ işleri devlet komitetiniñ reisi Zaur Smirnov bildirdi ki, Qırımtatar Milliy Meclisini yasaq etmek mahkemesinde onıñ hızmeti qabaat tarafına qoltutacaq.
Bunı Smirnov Qırımnıñ Rusiye yolbaşçısı Sergey Aksenovğa cumaaqşaım künü ayttı, dep haber ete komitetniñ matbuat hızmeti.
«Aprel 7-de komitet Meclisni estremist teşkilâtı olaraq yasaq etüv mahkemesine celp etildi. Qabaat tarafına qoltutacaqmız, vesiqalar azırlana. Mence, Meclis qırımtatar adını taşımaz artıq», – dedi Zaur Smirnov.
Mart 3 sabası Qırımda Qırımtatar Milliy Meclisniñ qapatılmasınen bağlı mahkemeniñ ilk oturışı keçti. Belli ki Rusiye nezaret astında bulunğan Qırım prokurorı Natalya Poklonskaya mezkür teşkilâtnı yasaq etip, ekstrimistik teşkilâtı olaraq tanımaq işinde davacı olaraq çıqtı. Qırımtatarlarnıñ temsil organında böyle ariza özünde bir sıra uquqiy añlaşılmamazlıqlar taşığanı aqqında aytmaqtalar, böyle dava peyda oluvınıñ siyaset sebepleri bar ve maneviy ceetten olar bu yasaqqa endi azırlanalar.
Rusiye nezaret astında bulunğan Qırım prokuraturası mart 3 künü keçirilgen mahkeme oturuşında «delil» olaraq 630 saife ve 10 disk malümat teslim etti. Meclis menfaatını qoruğanlarğa vesiqalarnen tanış olmaq içün 7 kün berildi.
Makemeniñ yañı oturışı mart 10 kününe belgilengen.
Qırım uquq qorçalayıcı gruppası halqara teşkilâtlarğa Qırımdaki Milliy Meclisniñ qapatılmasına izin bermemek arizası ile muracaatta bulundılar. Mezkür arizada uquq qoruyıcılar halqara teşkilâtlarnı qırımtatarlarğa ve Milliy Mecliske qarşı yapılğan siyaset sebebinden taqip etilmesine yol bermemek ve mümkün olğanı qadar buña tesir etmege çağıralar.
Avropa birligi qırımtatar milliy meclisniñ qapatılmasınen bağlı öz raatsızlıqnı endi bildirdi.
2014 senesiniñ başında Qırım Rusiye tarafından işğal etilgen soñ qırımtatar liderleri Refat Çubarov ve Mustafa Cemilevge yarımadağa 5 yıl devamında kirmege yasaq ettiler.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.