Qırımtatar Milliy Meclisi reisiniñ muavini İlmi Ümerov Ukraina ordusında askerlik yapmamaq içün esas Ukrainadan Qırımğa qaytqan 500 qırımtatarı aqqında malümatnı red etti. Bunı Ümerov Qırım.Aqiqatqa bildirdi.
«Böyle bir şey eşitmedim, belki, Zaurda «qayd olalar», daa doğrusı – öz başına uydurdı bunı», – dedi Ümerov.
Onıñ fikirince, Rusiye Silâlı quvetlerinde askerlik yapmamaq içün qırımtatarlar Qırımdan kete bile. «Maña köre, «baar mevsimi» arfesinde Qırımdan bayağı adam ketecek», – dep qoştı Ümerov.
Bundan evel Rusiye kontrol etken Milletlerara munasebetler ve sürgün olunğan grajdanlar işleri boyunca devlet komitetiniñ reisi Zaur Smirnov bildirgenine köre, 500 qırımtatarı Ukraina Silâlı quvetleri saflarında askerlik yapmaq istemeyip, esas Ukrainadan Qırımğa keri qayttı.
Smirnov dey ki, 2014 senesi 800 qırımtatarı Qırımnı terk etti. Qırımtatar halqınıñ lideri Mustafa Cemilevniñ bildirgenine köre, işğal başlağanınen 35 biñ insan, şu cümleden 20 biñ qırımtatarı, yarımadanı terk etti.
Ukraina uquq qorçalayıcısı Böris Zaharov qırımlılarnıñ Rusiye ordusına çağırılmasını arbiy cinayet olaraq tanıdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.