«Prosveşçeniye» adlı rusiye neşriyatı derslik kitaplarını qırımtatar tiline tercime etip bitirdi. Derslikler 1 - 9 sınıf talebeleri içün azırlanmaqta. Moskva nezareti astında bulunğan ilim, tasil ve gençler nazirliginiñ matbuat hızmeti bildirgenine köre, dersliklerniñ birinci qısmı yarımadağa fevral ayında ketirildi, mart ayında ise tolusınen teslim etildi.
«Derslik kitapları eñ yaqın zamanda mekteplerge teslim etilecek. Bu afta olarnı ketirip başladılar», - dep aytıla mesacda.
Hızmette haber etkenleri kibi, bir yıl içinde mütehassıslar tarafından Rusiye Federatsiyasınıñ oqutuv programması boyunca 44 adlama kitaplar tercime etildi. Derslikler «Prosveşçeniye» neşriyatınıñ tarafından neşir etilip, 45 biñ tane nushasında yarımadağa yollanıldı.
«Qırımtatar tili - devlet tillerinden biri ve sakinlerniñ çoqusı içün tuvğan olaraq sayılmaqta. Bu dersliklerni pek beklediler», - qayd ettiler matbuat hızmetinde.
Berilgen malümatlarğa köre, Qırımda 16 mektep qırımtatar tili oqutuvınen, daa 36 mektepte mütenasip sınıflar çalışmaqta.
Belli olğanı kibi, tercimelerni kerçekleştirmek içün, temel olaraq «Prosveşçeniye» neşriyatınıñ 1-9 sınıflarınıñ esas dersleri alınğan. Bular: riyaziyat, tarih, cografiya, tehnologiya, cemiyetşınaslıq ve başqaları.
Bunıñnen bir sırada, Moskva nezareti astında bulunğan Qırım ilim, tasil ve gençler nazirligi tarafından, qırımtatar tilini ögrenmek içün mahsus dersler programmaları işlep çıqarıldı. Olarnıñ arasında «Qırımtatar tili (tuvğan)», «Qırımtatar edebiyatı», «Qırımtatar tili (ögey)» programmaları bardır. Qayd etilgeni kibi, mezkür programmalar ilk sefer teşkil olunğan, neşir etilgen ve nazirlikniñ reyestrine kirsetilgen.
Milliy Meclisi ve qırımtatar cemaat teşkilâtlar ilân etkenleri kibi, Qırım Rusiye tarafından işğal etilgen soñ, milliy mekteplerde talebelerni tek rus tilinde oqutalar, milliy mektepler ne kerekli derslikler, ne de oquv qullanmalarını elde eteler.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.