Mart 12 künü, Avropa Birligi, Donbass davasınıñ ve Qırım işğaliniñ mesülietli ukrain ve rus adamlarına qarşı sanktsiyalarnıñ müddetini daa 6 ayğa uzattı. Bu aqta Avropa Birliginiñ matbuat hızmeti bildirmekte.
Mesacda qayd etilgeni kibi, qarar, Avropa Birliginiñ resmiy jurnalında neşir etilgen soñ ömürge keçirilecek.
Mart 10 künü Avropa Birliginiñ Şurası, Ukraina mustaqilligi ve territorial bütünligini bozğan 146 insanğa ve 37 müessisege qarşı sanktsiyalarnı yarım yılğa uzattı. Aktivlerniñ buzlatılması ve kezinti yasaqları 2016 senesiniñ sentâbr 15 kününe qadar çalışacaq.
Ğarp, Rusiye tarafından işğal etilgen Qırım içün, Moskvağa qarşı sanktsiyalarnı 2014 senesi, bir qaç ayırı zarflarnen kirsetken edi.
Avropa Birliginde defalarca añlatqanları kibi, Rusiye minsk añlaşmalarını yerine ketirmegence, Ukraina territoriyasından çetel ordular ve tehnikasınıñ çıqarılması kerçekleştirilmegence, bütün qanunsız gruppalarınıñ silâları teslim etilmegence, ÖBSE tarafından Ukraina ve Rusiye sıñırında telükesizlik zonaları teşkil olunmağance, sanktsiyalarnı toqtatmaq meselesi köterilmeycek.
Bunıñnen bir sırada, Avropa Birliginde qayd etilgeni kibi, Qırımnen bağlı sanktsiyalar meselesi iç te baqılmay, lâğu etilüvi ise, tek Qırım Ukraina terkibine qaytarılğan soñ ola bile.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.