Pılıp Orlık Demokraktiya institutınıñ eksperti Natalya Belitserniñ zanınca, yarımadada Qırımtatar Milliy Meclisini yasaq etmek ıntıluvları Qırımda musulmanlarğa qarşı yapılğan basqı quvetleşkenini ifadeley.
Bunı o «SSCB, 1991 – 2013 seneleri Ukrainada ve bugün qırımtatar meselesi» munaqaşasında ayttı, dep haber ete Qırım.Aqiqat.
«Qırımda basqı arta, birinciden, musulmanlarğa qarşı. Ekinciden, Meclisni yasaq etmek ıntıluvı, doğrusını aytqanda, menim kibi bir ekspert içün tapmaca oldı. Meclisni yasaq etecek mehanizmler yoq, çünki resmiy şekilde teşkilât qayd olmağan. ATRge yapqanları kibi litsenziyanı alamazlar, bir de bir vesiqanı lâğu etemezler, çünki temiz bir uquq aktsiyası degil», – dep qayd etti Belitser.
Munaqaşa Kyivde fevral 23-te «Knıgarnâ «E» tükânlarından birinde «Ev.Deñişmeler» («Dim.Zminı») leyhası çerçivesinde olıp keçti.
Your browser doesn’t support HTML5
Qırımtatar meselesi: SSCB-den başlap bugünge qadar (video)
Qırımnıñ Rusiye prokurorı Natalya Poklonskaya mahkemege muracaat etip, Qırımtatar Milliy Meclisini yasaq etip, ekstremistik bir teşkilât tanımağa talap etti. Qırımtatarlarnıñ temsil organı bildirdi ki, dava arizasında bir sıra uquq hatası mevcut, em de dava siyasiy sebeplerden çıqarıldı.
Qırım uquq qorçalayıcı gruppası halqara teşkilâtlarğa muracaat etip, Qırımda Qırımtatar Milliy Meclisiniñ yasaq etilmesi mümkün degil, dep bildirdi. Uquq qorçalayıcılar halqara teşkilâtlarnı elinden kelgenini yapıp, qırımtatarlar ve Qırımtatar Milliy Meclisine qarşı siyasiy sebepli basqığa yol bermemege rica eteler.
Avropa Birligi Qırımtatar Milliy Meclisiniñ faaliyeti yasaq ete bileceginden qasevetlengenini bildirdi.
2014 senesiniñ başında Qırım Rusiye tarafından işğal etilgen soñ qırımtatar liderleri Refat Çubarov, Mustafa Cemilevniñ yarımadağa kirişleri yasaq etildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.