Ukraina musulmanları diniy idaresiniñ reisi Said İsmagilov bildirgeni kibi, Aqmescitte yanvar 28 künü İslâm medeniy merkeziniñ tintüvi vaqtında «tesadüfen» yasaqlаnğan edebiyat tapıldı.
«Tünevin silâlanğan Rusiye uquq qoruyıcıları Aqmescitte Mokrousov soqağı,7 adresi boyunca yerleşken İslâm diniy merkeziniñ camisini sarıp aldı ve tintüvni keçirdi. Keçken sefer Rusiyede yasaqlanğаn bir qaç kitapnı kelip attılar, bu sebepten memuriy işlerni açtılar… Tünevin tintüv vaqtında kene «tesadüfen» yasaqlanğan edebiyatnı taptılar. İmam ant ete (men de oña inanam), aqşam, camini qapatqanda, bu kitaplar anda yoq edi», – yaza müfti Facebookta.
Onıñ sözlerine köre, eki kipatnı «taptılar»: Muhammad peyğamberiniñ duaları ile «Krepost musulmanina» («Musulmannıñ qalesi») ve Muhammad ibn Abdulvahhabnıñ «Kniga Yedinobojya» kitaplarını tapqanlar. Müellifni «vahabbizm»niñ tesisçisi olaraq adlaylar. «Bu kitap evelden Rusiyede rus tilinde basılğanına (Ukrainada iç bir vaqıt basılmay edi) baqmadan, bu kitap, imamlarnıñ sözlerine köre, Aqmescitniñ İslâm medeniy merkeziniñ cami ve kitaphanelerinde iç bir zaman yoq edi», – qayd etti Said İsmagilov.
«Camige bu kitapnı kelip atıp, cemiyetke bir şey «yüklemege isteyler», Rusiyede bunıñ eyiligi olmaz», – qayd ete Ukraina müftisi.
Qırımnıñ Rusiye uquq qoruyıcı organları Aqmescitte Mokrousova soqağında yerleşken caminiñ silâlı insanlar tarafından sarıp aluvını añlatmaylar. Bunı Qırım.Aqiqatqa Qurultaynıñ Merkeziy Saylav komissiyanıñ başı Zair Smedlâyev bildirdi.
Onıñ sözlerine köre, bu shemağa Canköyde Elif bala qırımtatar merkeziniñ teşkerüvi de kire. «Bu bir zıncırnıñ alqalarıdır. Vazife – islâm terrorizmi ile küreşkenini kösterecek olalar».