Ne zemaneviy Ukrainada, ne Rusiye Federatsiyası, ne Sovet Birliginde yerli referendumlarnıñ keçirilmesi aqqında qanun yoq edi. Bunı Qırım.Aqiqat Radiosınıñ aqşam efirinde Qırım siyasetşınası Aleksandr Stariş bildirdi.
Bunı siyasetşınas 1991 senesi Qırım referendumı aqqında tarif etkende dedi.
«Birden aytayım, er kes añlasın dep: ne Birlikte, ne bugünki Rusiyede, ne zemaneviy Ukrainada yerli referendum aqqında qanun yoq. Şunıñ içün bu kibi tedbirlerniñ plebistsit tüsü bar. Yani, ciddiy aqibetleri olmağan cemaat fikriniñ soravıdır», – qayd etti Aleksandr Stariş.
1991 senesi yanvar 20 künü Qırım Muhtar Sovet Sotsialistik Cumhuriyetiniñ ğayrıdan tiklenmesine umumqırım referendumında Qırım sakinleriniñ 93,26% qol tuttı. Rey berüvge: «Siz Qırım Muhtar Sovet Sotsialistik Cumhuriyetiniñ SSCB subyekti ve İttifaq añlaşmasınıñ iştirakçisi olmasına qol tutasıñızmı?» suali çıqarıldı.
1991 senesi fevral 12 künü Ukraina Yuqarı Radası umumqırım referendumınıñ neticelerine esaslanıp, «Qırım Muhtar Sovet Sotsialistik Cumhuriyetiniñ ğayrıdan tiklenmesi aqqında» qanunını qabul etti, dört aydan soñ 1978 senesi Ukraina SSC Anayasasına deñişüvler kirsetildi.
1991 senesi sentâbr 4 künü Qırım Muhtar Cumhuriyetiniñ Yuqarı Şurasınıñ toplaşuvı cumhuriyetniñ devlet mustaqilligi aqqında beyannameni qabul etti, onda Ukraina terkibinde uquqiy demokratik devletni teşkil etmek ıntıluvı aqqında söz kete.
1991 senesi dekabr 1 künü Bütünukrain referendumında Qırım sakinleri Ukraina mustaqilligi aqta saylavlarda iştirak etti. Qırımlılarnıñ 54% Ukraina mustaqilligine qol tuttı.
Qırım Rusiye tarafından 2014 senesi işğal etilgeninden soñ yarımada akimiyeti Qırım Muhtar Cumhuriyeti Kününi Qırım Cumhuriyeti Kününe deñiştirdi ve şu künü raatlıqnı ilân etti.