Aqmescitte Qırım Yuqarı mahkemesiniñ «fevral 26 işi» boyunca toplaşuvnıñ başlanuvı bir saatke keçiktirile. Mahkeme yerli vaqıtqa köre saat 10-da (Kiyev - saat 9) başlanmaq kerek edi, dep bildire Qırım.Aqiqat.
İlk nevbette mahkemege Ahtem Çiygoznıñ Qırım ve Rusiye advokatları Emil Kurbedinov ve Nikolay Polozov kelgenler. Bina ögünde Qırım maznunlarınıñ tuvğanları ve yaqınları, Qırımtatar Milliy Meclisiniñ temsilcileri buluna. Bir qaç «halq imayesiniñ vekili», kazaklarnıñ bulunması qayd etildi.
Binanı politsiya hadimleri qoruy, mahkeme yanında demir isarları qoyula. Bunıñ ile mahkeme binasınıñ qatlarına da kirişler qorulandı.
İşniñ esas şaatları – Qırımnıñ Rusiye başı Sergey Aksenov ve qabaatlayıcı – Qırım prokurorı Natalya Poklonskaya – mahkemege daa kelmediler.
Your browser doesn’t support HTML5
Начало суда по делу «26 февраля» затягивается (видео)
Qırımnıñ Rusiye Yuqarı mahkemesi yanvar 15 künü Meclis reisiniñ muavini Ahtem Çiygoz, Mustafa Degermenci, Ali Asanovğa nisbeten «fevral 26 işi» boyunca qabaatnı seslendirecek.
Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütleviу tertipsizliklerde» iştirak etüvleri içün qabaatlana.