Qırım Rusiye başı Sergey Aksenov dey ki, yarımadağa internet-qamaçavınıñ telükesi yoq. Bu aqta o Aqmescitte dekabr 28 künü keçirilgen konfrenetsiyada bildirdi, haber ete Qırım.Aqiqat mühbiri.
«Bu ceetten Ukrainağa bağlı degilmiz», – dedi Aksenov.
Sözlerine köre, Qırımda internetniñ 80% «Krımtelekom» teminler.
«Ukraina tarafından etilgen areketler neticesinde tek ufaq operatorlar zarar köre bile. Bu çarşını bütünley ğayıp etmege isteseler, 20% rayonında bile coyarlar», – dey Aksenov.
Qırım qamaçavınıñ yañı basamağına keçmege – yarımadağa qıtaiy Ukrainadan mobil ve internet bağnı söndürmek qararı aqqında evel qamaçav teşebbüsçisi Lenur İslâmov aytqan edi.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.