Energetik strategiyalar institutınıñ eksperti Yuriy Korolçuk degeni kibi, qıtaiy Ukrainadan Qırımğa elektrikniñ berilmesi toqtatılğanından soñ Rusiye yarımadanı Kubanden elektrik energiyası ile teminlemege mecbur oldı.
Bu fikirni o dekabr 16 künü Qırım.Aqiqat Radiosınıñ saba efirinde bildirdi.
«Areketlerimiz ile, teessüf ki, mevamım bu, tezleştirdik, Rusiyede Qırım meselelerinde radikal adımlarnıñ tarafdarı olğanlarğa pekişmege imkân berdik. Qırımnıñ muhtar elektrik teminlevine paranıñ ayırılmasını istegenlerge», – dedi o.
Salı künü, dekabr 15-de, Rusiye prezidenti Vladimir Putin Kremlden Qırımğa Krasnodar diyarından energetik köpürniñ ekinci yolağınıñ berilmesi aqqında bildirdi, o yarımadağa qoşma 220 MVt energiyasını berecektir.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Dekabr 8 künü Ukraina energetik tertibatından Qırımğa bir elektrik yolağı boyunca elektrikniñ berilmesi ğayrıdan tiklendi. Amma Qırımda alâ daa ağ qazaları yüz bere.