Ukraina prezidentiniñ qırımtatar halqınıñ işlerinden vekâletlisi Mustafa Cemilev ve Qırımtatar Milliy Meclisiniñ reisi Refat Çubarov Ukrainada 28 diplomatik eyyetniñ temsilcilerini Qırımda BMT reberligi altında insan aqları ile bağlı vaziyetni nezaret etecek daimiy eytniñ teşkil etilmesinde yardım etmege çağırdı.
Bu aqta olar Kiyevde jurnalistlerge dekabr 15 künü Qırımtatar Milliy Meclisiniñ diplomatik eyyetlerniñ ve halqara teşkilât temsilcileri ile dörtünci adetiy körüşüvinden soñ bildirdiler, haber ete Qırım.Aqiqat mühbiri.
«Bunı Qırımnı işğalden azat etmek içün yapmaq kerek – qayd etti çıqışında Cemilev», – dedi Çubarov. Aytqanı kibi, diplomatlar buña olduqça muqayt yanaştı. «İzaatları (diplomatlarnıñ – QA) olduqça formal edi,… Rusiye buña izin bermez, dediler», – dep qoştı Meclis reisi.
KrımSOS cemaat teşebbüsiniñ temsilcileri diplomatlarğa Qırımda Rusiye akimiyeti tarafından insan aqlarınıñ bozuluvı boyunca yapılağan nezaret neticelerini taqdim ettiler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.